魚缸趣譚:A股ETF未旺 萬事起頭難

幾經辛苦,A股終順利入摩。不過,由於今次只是試水性質,故於MSCI新興市場指數的佔比僅0.73%,相當於180億美元左右的潛在流入,少到不能再少。點都好啦,總算是A股市場對外開放的一大步,可喜可賀。

我們當然不會預期對港股有咩幫助,事關受惠的只是內地稀有品種,尤其是沒有H股的公司,如興業銀行(601166.SH)及貴州茅台(600519.SH)等。粉絲們想捕捉這個機遇的話,並不是揀南方A50(02822)或安碩A50(02823),而是揀添富主要消費(03107)呀!唔信你望望基金持股比例,直頭中晒!不過,無計啦,ETF於香港始終撈唔起,搞到股民有寶都未識執。添富主要消費昨日零成交,齋都未開,又點會有人敢衝入去?

民企風暴打散信心

然而,作為A股的投資者都好慘。滬綜指於昨日上午配合成交突破60日線3,155點,到下午就傳來中銀監要求內銀排查「明星民企」的噩耗,滬綜指更倒跌8點收市。

其實,早前的安邦保險集團已有板睇,今次就輪到萬達(002739.SZ)、海航同埋復星系。有傳萬達的債券於內地被拋售,在港上市的復星國際(00656)同復星醫藥(02196)都瀉近6%呀陰公!

開講都有話,沙塵滾滾,殺錯良民,恒指亦再度失守10日同20日線。本來港股近日都呈現泰山壓頂的迹象喇,如今再來一個「民企風暴」,打散一下股民的信心,睇怕恒指都要下試返六月的低位25,557點,再穿的話,唔排除會殺埋25,200點的重倉牛證!

富昌金融研究部總監 譚朗蔚(作者為註冊持牌人士)