絲絲講場：松齡主席護老教師「上身」

點解？原來主席嚴定國以前做過校長！主席分享佢轉行嘅故事，回想當年喺港島區辦私立中學，政府計劃將人口往新界遷移，但又唔想立即喺港島殺校，所以當時教育署就向私校買位。

不過隨住港島學童逐步減少，政府買位亦漸減，嚴主席就同舊部轉行做護老。

佢話，依家政府同私營安老院合作做緊嘅「改善買位計劃」，同以前嘅學校買位模式真係好相似。對住老人家佢有時都會老師上身，畀足愛心、細心同耐心去對待佢哋，仲將自己嘅寫字樓設喺院舍入面，方便同院友交流添！

余絲韻