Market Insight：手機設備股重新發力

舜宇升勢有餘未盡

查實除券商股外，其他板塊普遍無太大動力，其中手機零件股就跑贏大市，當中舜宇光學（02382）及比亞迪電子（00285）即市皆創上市新高，而高偉電子（01415）、通達集團（00698）、信利國際（00732）及中興通訊（00763）升幅則介乎1至5%不等。

講開又講，今年蘋果公司將發售新手機，相關板塊其實已預先炒咗一轉。就以舜宇為例，股價基本上自去年十二月開始拾級而上，直至今年五月先回氣。不過，昨日又重新發力，最高見過70元的上市新高，尾市升幅收窄至4.6%報69.3元，成功上破近月屢攻不破的67元阻力，後市若能進一步突破70元關阻力，升勢應有餘未盡。

睇番舜宇五月份手機鏡頭、車載鏡頭及手機照相模組出貨量分別上升87%、52%及10%，可見股價做好確有根有據。早前大摩及麥格理均看好集團前景，有信心的投資者不妨伺機跟進，目標76元，穿65元止蝕。

工蓋急升 眼看手未動

細價股時不時有驚喜，博唔博得過就真係要睇天時、地利同人和，昨日有隻平日靜如止水的工蓋（01421）上咗升幅榜，以大成交並接近全日高位收市，全日升18.9%報0.345元，真係幾吸睛。

翻查通告，發現此股周二公布按每股0.266元配股，配售最多1.52億股，而配售價較當日收市價每股0.29元雖然只折讓約8.28%，但公布配售後昨日即成交大增，股價異動，表面上有資金博燒冷灶。

走勢上，集團股價自去年七月於3元水平大跌後，就一直於低位浮沉近一年，公布配售後才突然抽升，唔通跟手有大動作？在下就無水晶球，對此類細價股亦唔會太上心，但既然佢突然異動，就將佢放入觀察名單先，免得要跟進先做功課。

大把時間部署買貨

講番大市，昨日呢頭傳來A股入摩，嗰頭又傳來外電報道標普擬將中國的債券信貸評級下調，到底外資係刻意唱淡力壓中國股票方便吸平貨，定真係睇中國市場睇得咁淡，各位應心裏有數。從昨日早段港股先插兩百再反彈倒升，而最終又再跌逾百點收市，顯示好淡大戶在角力。

好老實講，從南韓及台灣市場獲納MSCI新興市場指數後股市表現做好的經驗來看，古勝並唔相信班大戶唔想買貨，只係買貨更係愈低買愈好，反正現時距離正式生效日期還有時間。故可以推斷，未來六至九個月，類似的好淡爭持場面次數會愈來愈多，大家要緊握扶手。

類似港交所（00388）、中資券商股，長遠肯定受惠，只係吸納策略毋須急進，實力派可採分注逢低收集，以盡量降低平均價。以港交所為例，昨日即市古勝見大市跌緊，就保守啲喺東網Money18即市推介內指可在196元樓下落首注，反正中長線睇坐底睇兩成回報，於200元樓下都可以睇位作部署。

古勝