絲絲講場：百麗賺少截 盛總照加人工
「鞋王」百麗國際（01880）上市十年，由藍籌股走到依家打算私有化，難免令人唏噓，上個月CEO盛百椒仲攬晒上身話「公司未有及時轉型，責任在我！」不過話口未完，絲絲一睇百麗年報，咦！盛總舊年人工不單止冇減，仲有得加添！
太子爺花紅唔見兩成
百麗最新年報顯示，盛總舊年薪金同花紅都加咗啲，令總薪酬加到674.6萬蚊人仔，升幅雖然只得1%多少少，但相對舊年集團純利跌18個巴仙來計，仲有人工加都真係唔錯。
睇番百麗太子爺「細鄧生」鄧敬來舊年花紅就少咗兩成，但薪金就加咗，拉番勻總薪酬就升咗2個巴仙。
不過講開又講，盛總足足服務咗百麗25年，單計苦勞都有排計啦，而且佢仲講明公司私有化後都繼續幫多兩、三年，完全係有情有義，老闆鄧耀梗識做啦。
余絲韻