絲絲講場：敵人的敵人就是朋友？馬化騰王衛互捧

馬化騰話用咗好多精力先請到王衛，咁王衛當然又多謝番馬主席畀呢個機會佢：「今天這麼多媒體，我的低調牌坊就真正的沒有了」！

王衛台上仲話，十年前自己理解騰訊只係QQ，冇咩特別，但十年後嘅今日，差別就好大，全因「一念之差」。

因菜鳥事件Friend咗

佢話自己過去只係專注做自己嘅產品，但馬化騰打造內部環境之餘，亦打造外部環境，開放合作；就係咁，保守同開放帶來差別，今日順豐市值2千億元，但騰訊就有成2萬億元咁話。

連「牌坊」都唔顧，仲開口曲線捧人家，乜原來佢哋咁Friend？絲絲即刻諗起，之前馬雲所掌舵阿里巴巴旗下菜鳥，同順豐因為數據問題起風波，騰訊都有公開表態撐順豐，有唔少人仲解讀背後其實係騰訊與阿里之爭。See！敵人的敵人就是朋友。

查實，論到鬥金句，馬化騰一啲都唔輸蝕阿里主席馬雲。講到粵港澳大灣區，馬化騰就咁形容「這煲湯還在煮，還未滾開，都是生的，只是混在一起。」咁應該點？佢話需要更重視科技發展，話「政府搭台出政策，企業才能更好地在台上演戲」，仲要「搬大樹，引鳳凰」，等人才有用武之地。

馬化騰仲話，粵港澳三地政府應該將競爭心態化為合作心態。計絲絲話，不如等騰訊同阿里試咗先。

余絲韻