絲絲講場：羅康瑞兄弟大鬥「髮」

一向有「上海姑爺」之稱嘅Vincent，提到二哥旭瑞、三哥嘉瑞繼承父親（羅鷹石）基因。當中，旭瑞最似老竇：廿幾歲已經甩頭髮。Vincent話自己好彩（頭髮算濃密），可能係近媽咪（羅老太羅杜莉君）基因。

話時話，最似阿爸羅鷹石個髮型怕且係孻仔啟瑞。咦，Vincent尋日對佢點解隻字不提？

Vincent又話喜歡食甜品，無甜品唔成餐，喜好甜品係家族傳統，惟奇怪得旭瑞有肚腩。其實睇樣估唔到Vincent今年已69歲。佢自言喜歡運動養生，耍開詠春，但之前因踢腿踢得太高，傷咗筋骨，佢話早一個禮拜仲要拐杖扶喎。

借李顯龍兄妹爭拗自嘲

尋日Vincent提到一帶一路投資上講起新加坡喺東盟內嘅角色時，突然「辣」到新加坡總理李顯龍三兄妹爭拗事件，Vincent即自嘲自己屋企都有類似風波，但佢只係輕輕帶過。

Vincent昨於另一場合就形容今趟家族風波係「悲劇」，認為「公道自在人心」，唔想就事件多作評論。被問到會否出席下場家庭會議，Vincent亦無直接回應。不過絲絲聽聞，佢公務都已經忙到不停畀老婆投訴。

余絲韻