孖妹S檔案：脫歐未脫險 「英」該點樣炒？
「情像雨點，似斷難斷，愈是去想，更是凌亂……」眨吓眼，廿四號就係英國脫歐一周年喇，歐盟同英國之間嘅一段情仲瀕臨喺愛與痛的邊緣，慢性分手雖然最折磨人，但想喺「痛苦」中尋找快樂原來唔係咁難，喺鎊匯、樓市同股市仍然有投資綠洲，不如睇吓相關範疇嘅專家同投資者朋友有乜吸金秘技？
樓：買獨立屋抗貨幣貶值
朱：居英港人、資深投資者 朱永年（Andy）
彩兒：Andy，你脫歐前沽盡幾層香港物業，套現移民英國，點知港樓勁升，英國前景又未明，當時真係好擔心你睇唔開……
朱：當時心理梗有影響！我一五年中移民，兌英鎊時，係1鎊兌12港元左右，依家先兌到約9.95港元，梗係會諗若遲兩年移民就好喇，但已成定局啦！公投結果出爐當日，英鎊曾狠插逾一成，雖英國銀行存款息好過香港，但好彩我舊年喺英國將六成資產買咗兩個物業，咁先對抗到英鎊貶值。
Kitty：住豪宅咁正？我寧願做你隻貓好過！
朱：我依家層自住物業係加的夫（Cardiff）嘅獨立屋，實用面積約2,000方呎，480萬港元，喺當地樓價算係中高檔，咁嘅價喺香港頂盡買到個兩房單位，倫敦住宅平均講緊要80萬鎊（約796萬港元），同埋即使公布脫歐後倫敦樓價有回落迹象，但因加的夫係比較細嘅城市，所以按年比，我層樓樓價係微升，睇番成個威爾斯省分層單位，截至三月止按年仲升咗2.9至5.3%添。
我舊年喺加的夫嘅Roath學校區，連租約買入一間實用面積約1,600方呎半獨立屋做學生宿舍，買入時樓價250萬港元，租金回報超過7厘，當時留意到宿舍牌唔再發，市場有需求，所以即刻拍板買入，都算好彩，起碼回報可彌補番英鎊嘅跌幅，依家心理都安慰啲，未來若有筍盤都想買多個。
港股機會多 吼二線
彩兒：英股較脫歐前升約兩成，會否轉戰英股？
朱：我仍心繫港股，有繼續留意香港新聞，不過有時差，好少實時睇住港股開市，唔會通頂，但一起身就會上港交所個網睇通告，睇番香港財經新聞，現時有留起約8%資產喺香港，作中長線投資。港股多國際機構同高增長嘅中資股，所以機會遠較英股為多，但港股大市累升已多，我近期主力睇二、三線股，現時持有環保概念股雲南水務（06839）、博轉勢嘅中廣核電力（01816），另外之前喺油價約30美元時買入中國石油股份（00857）。
英鎊曾跌到去1.18美元水平，相信已反映脫歐事實，再跌機會唔高，佢若跌到去1.2水平，我就會再掃鎊。其實我喺生活上已感受到英國嘅通脹，特別係德資超市，加價特別快，冇加價嘅貨品就細件咗，哈哈！好在我做嘅骨瓷生意係由中國拎貨，所以冇乜影響。
股：恐陷調整 利淡金融業
馮：長江證券資產管理（香港）董事總經理 馮時煖（Alan）
Kitty：舊年英國脫歐消息一出，嚇到國際投資者鼻哥窿都冇肉，美股曾急跌超過六百點、港股一度跌穿兩萬關，依家英國首相文翠珊同歐盟傾條件，歐盟實畀啲顏色佢睇，會唔會再推冧個市？
馮：喺脫歐公投前，大部分人都相信脫歐唔會發生，因當時輿論留歐係佔大多數，所以影響先咁大，其後股市快速回升，但英鎊就一蹶不振，我相信脫歐路途會好漫長而反覆，皆因英國大選有小意外，文翠珊所屬嘅保守黨喺下議院議席少咗，未來意見會反覆，歐盟政治談判好有耐性，預計會拖長嚟傾，英國就喺下靶位，加上現時文翠珊支持度下降，情況對英國不利。
滙控或受累成本升
馮：有唔少國際機構以倫敦作為歐洲據點，一旦脫歐，交易成本會上升，所以我覺得英股有機會調整，最利淡嘅一定係金融服務業，喺關卡之下行政費會提升，所以就首當其衝，港股都會受影響，恒指成分股入面滙豐控股（00005）權重大，英國係佢好主要嘅市場，若第日成本上升咗自然有影響，另外，鎊匯一旦跌5至10%，企業盈利邊際利潤只有單位數字，分分鐘會倒蝕。
彩兒：咦？咁喺英國有眾多投資嘅長和系都有機會受累喎，投資者喺脫歐狂潮中點部署先可屹立不倒？
馮：我認為未來英股去向對環球股市影響唔大，主要牽動包含滙控嘅恒指，若香港投資者投資嘅係MSCI或富時嘅指數，就免受滙控影響喇。不過，我仍睇好下半年恒指，相信有機會上望27,000點。一般散戶投資期只係幾個月，最好就避開相關股，始終時間都有成本；但有耐性嘅投資者就可等股份超賣嘅機會，若見明顯調整，不妨買入長線投資，但預計調整幅度唔會超過10%。
匯：鎊1.22料見底 睇位入
王：星展香港財資市場部大中華董事總經理 王良享
彩兒：英鎊過去一年跌到咁，搞到我係咁喺英國網購啊，王生，我就快破產喇！
王：你咁風趣嘅？舊年因為脫歐，令環球股市同匯市出現震盪，係因為佢係近年首次嘅國際性黑天鵝事件，當時唔止英鎊，仲有黃金、日圓、美股都受牽連，但公布咗脫歐後，最受累嘅只係英鎊，再加埋特朗普狂潮推高美元，令英鎊跌到去1.2美元以下……至於英股，最初啲人預期富時100指數會跌少啲，因成分股有70%係英國以外收入，另外就預計富時250指數會有持續嘅跌勢，皆因主要係內需股。但後來，投資者覺得收海外資金、以弱英鎊計價仲好，加上預期脫歐過度期長，憧憬英國經濟唔會太差，又受環球股市推升帶動，英股就回升番。
Kitty：買咁多英國貨，可唔可以買啲英股對沖？嘻嘻！
王：我覺得英股依家先進入下跌周期，因脫歐公投前，投資者喺不明朗因素下停手唔做商業投資，令英國經濟已走下坡，經濟中有一啲組成部分會有短期反彈，例如有銀行或企業要由英國搬走總部，或者再喺歐盟開子公司都好，法律同制度有機會唔同咗，所以有啲行業，例如律師、會計師或專業管理公司等，短期需求會多咗；另外，英鎊跌咗，帶動旅遊，入口貨品價格提升短期未反映喺售價，亦令零售業向好。
英股危 避航空汽車
王：但係過咗一年，見到英國經濟增長放慢咗好多，首季按季增長得0.2%，最弊未來有機會出現負增長，但通脹又高，五月消費物價指數去到2.9%，以前上到3%就要加息，但依家經濟唔得，點加息呢？仲要諗方法去刺激經濟添。未來脫歐談判只係視乎係硬定軟，工黨喺今次拎嘅席位多咗好多，領袖郝爾彬係極左派、信奉福利主義，佢有市場會令文翠珊所屬保守黨左傾，或令國家短期支出急增，相信財赤會加大。之前有好多投資者趁機入貨，加上機構投資者嘅收購合併活動增加，現時英股有啲危險，尤其係富時250指數中嘅航空、機械、同埋汽車板塊。
彩兒：我想去番轉英國，點兌鎊好？
王：英鎊其實好彩，因美國加息，美元都未必一定升，早前美元強勢，係因為對美國總統特朗普嘅期望大，現時美匯去番佢上任前水平，預計今年美國經濟增速或者會喺2%以下，特朗普嘅稅改同減稅方案就行唔到住，加上縮表同加息應該唔會同步進行，今年美國或者加唔到3至4次息而令美元走弱，我相信英鎊喺1.22水平會見底，若子女會去英國讀書或有意去旅行都可睇位入市。
Kitty、彩兒