Market Insight：體品股李寧追落後

近日科技股抖氣，不妨睇番體育用品股，早幾日古勝叫大家追番隻李寧（02331），種種迹象所見，私募基金TPG同李寧分手，沽貨退出中長線好處多過壞處，初步結果所見，股價由第一日批股出街，挾高9.1%見5.8元後，連日升勢慢火煎魚，上周五高見6.2元，最終升2.3%收報6.1元。

一間公司有基金股東插手，其實有辣有唔辣，好處係改善管治，但好似TPG一類私募基金，底裏都係講貨如輪轉，唔會長期畀一間公司壓住大筆資金，同佢做人世，有水位自然會想exit。同時間，市場明知你遲早沽貨，即使其他基金想買，都係睇實私募基金沽貨時間表做人，一於等折讓批股接平貨。

遠的不提，今年五月萬洲國際（00288）基金股東以每股6.55元清倉沽掉手上近60億貨，萬洲股價再衝高一成七，到近期市況唔就先肯停。過去三年成個體育用品股復甦周期中，李寧實屬大大大落後，唔信同隻安踏（02020）比較下就知。李寧破咗6元關，中線應該係大有錢途，唔好咁心急落車。

等A股入摩再部署

上星期五港股反彈乏力，周末假期前夕例靜，近排美國科技股的走勢，確實令人憂慮有進一步調整可能，對股王騰訊（00700）不利。

港股兩萬六點久攻不破，終於見較為明顯的回吐，周線圖上，連續三支陽燭後斷纜，恒指全個星期跌403點收報25,626點。A股能否被納入MSCI，本周三將會揭盅，成敗對短期後市影響實在舉足輕重。

由MSCI下過一番工夫，氹芬佬一個低門檻進入，古勝講過A股今次入摩機會應該點睇都高於五成。不過，完全無部署，今明兩日先嚟臨急抱佛腳，賭佢開大定開細就實在無必要，不如過大海貪吓免費房兼食餐好過。

在下之前都講過，入摩與否，短期心理作用大於實際，長遠對中資重磅股份有重估可能，確認入摩後，先至補番多少內銀及內險股都應該唔遲。

敏華渾水勝負未分

基金半年結在即，基金趁機將累積升幅驚人的科技股減磅，合情合理，古勝理解唔到係，市場對聯儲局「縮表」計劃的反應。匯債市偷步炒緊美國經濟即將見頂，到底係咪股市自己睇錯，大家只能做事後孔明。

不過，踏入第三季，美國真正衝埋去財政懸崖，進入倒數，「侵侵」稅改亦準備送交國會審議，前路充滿不明朗因素，納指可能是成個市轉弱的一個領先信號，科技股玩家們不可不防。

狙擊行動未肯罷休

後市升跌未明，近排多得狙擊機構與中資公司拳拳到肉的博弈，股市花生多到食唔晒，令本來悶到痹的市況，多番些少茶餘飯後的話題。

敏華控股（01999）被渾水研究狙擊，從股價睇，殺傷力唔大，股價由放風狙擊前的7.33元，落到最低5.67元，上周五拗腰返回7.22元，累積只係跌咗毫幾子。事件中，最傷可能係純炒二手消息，高位撈低位打靶的一眾散戶。

敏華累積斥資過億元回購，嘗試以一己之力擊倒淡友，狙擊未境全功，渾水掌舵人Carson Block隔空發功，話對方急急回購純屬心虛，擺出咬實唔放姿態。睇敏華周五又交出近億元沽空成交，好淡對決恐怕有排玩。

古勝