絲絲講場：渾水阿Block突晒中文
沽空機構渾水創辦人Carson Block一一年憑狙擊嘉漢林業「響朵」後，不斷追打多間中國企業，令中資股、民企股聞風喪膽。啱啱呢個禮拜三，佢仲同埋「老友」F.G. Alpha Management創辦人Daniel David一人狙擊一隻港股，搶盡市場鎂光燈！究竟呢個美國人因咩事成為「民企剋星」呢？
變「民企剋星」全因父親
呢趟，Carson Block宣布最新狙擊目標係「梳化股」敏華控股（01999）後，佢接受本地傳媒訪問時話，○九年時佢爸爸心思思想投資幾隻喺美國上市嘅中資股，於是叫當時喺上海搞生意嘅佢去實地調查吓。本來佢唔係好想做，點知一睇發現有公司向佢爸爸講大話，亦令佢損手，更睇到上市公司核數師並無確保公司一切資訊屬實，於是走上「民企剋星」嘅道路。
正當大家以為Carson Block一介老外，邊有足夠能力判斷中資企業問題嘅時候，Carson Block即席用普通話講「你以為我不會說中文嗎？」，潛台詞即係「咪見我係外國人就諗住呃我」！雖則佢話自己返美國之後中文差咗，但照咁睇，唔知仲有幾多間問題企業可以畀佢「發揮」中文知識呢？
余絲韻