港股在超級星期四再下一城，恒指今浪首度企在兩萬六點關口之上，去迎接英國大選結果。恒指昨升88點收報26,063點，國指升38點收10,649點。期指日市收25,895點低水168點，國期收10,499點低水150點，分別有6.8萬及6.1萬張成交。
睇啱市，但做錯嘢賺唔到錢，真係慘過刀仔拮大髀。由結算至今，不理超短線上落，筆者建議大家只買不沽，可惜是長短棍在國期大注，恒期細注。國指的拉牛上樹走勢比近日炎熱天氣更納悶，踏入六月以來，恒指慢火煎魚累升近1.6%，已經夠悶，國指僅得0.4%進帳，對好友而言認真攞命。
日線圖上，國指依舊沿着10日線向上發展，無轉勢迹象，可惜周一國指現貨開得頗高，10,693點喊出第一口價，意味今日交不出44點以上升幅，兩連陽燭的周線圖會斷纜。
當然，對於自五月下旬升穿10,500點之後一直缺乏爆炸力，升唔多兼跌唔落的國指而言，未必引發太大沽壓；相反，如昨晚外圍明朗化，港股今日進一步走強，對下周初段市況頗有利。
John Mullen