Market Insight：滙控有條件接力領升

被「侵侵」炒魷的FBI前局長高銘出席聽證會，會否煮佢米尚待分曉。睇番「侵侵」上任五個月，專橫、獨裁、在政治上眼高手低，成績表劣績斑斑是路人皆見，讓美國再強大的承諾會否走數收場？大家心裏有數。

即使「通俄門」大步檻過，面對政治炸彈一籮籮，最怕過得初一過唔到十五，下半年稅改同避免跌入財政懸崖，在犯眾憎之下，肯定唔會輕鬆過關。

喺咁環境下，醒目錢只能選擇避險回流美債，也是近排債息回落的催化劑。近排高息債市場生翻晒，上周滙豐控股（00005）發行永續次級應急換股債（CoCo Bond），發行指導價奀到得5厘，依然有價有市，居然夠膽低過正股股息（昨為5.75厘）！如果衝CoCo Bond班大戶唔係熱到中暑暈暈吓，咁肯定現股價被市場低估，如果港股要搵新一浪升市火車頭，睇來睇去滙控最似樣。

李寧貨源已入強者手

私募基金股東TPG以每股5.25元悉售手上1.686億股李寧（02331）尾貨，相當於發行股本7.76%，套現8.85億元。李寧昨急彈9.1%收報5.84元，是近七個月以來新高。

回帶睇番，李寧是一一年引入TPG，兼且搵埋高層金珍君出任行政總裁，到前年金氏離任，由李寧重掌帥印，才開始食胡減磅部署。照牌面睇，清倉似人事變動後順便exit，多過睇淡行業或者公司前景本身。

瑞信上個月出報告，話李寧會係內地運動品牌中，未來兩年增長最勁其中一間，目標價睇6元。睇昨日個勢，批貨顯然落在強手之中，若破埋舊年十月5.97元的阻力位，進入無阻力區，短期見7元唔奇。

兩大中資愛股輪流炒

經歷過英國公投及美國大選，股民一句：「逢爆必冷是常識吧。」成個市當超級星期四無到，港股昨日升上二十三個月高位，今日會是反高潮結局抑或坐定粒六比大戶算中，大家好快就知答案。

瑞聲識得借力打力

個市昨日炒五月內地進出口數據超額完成，恒指今浪首次企穩兩萬六點樓上收市，升88點收報26,063點，主板成交稍低於800億元。焦點股瑞聲科技（02018）借力打力，強調同沽空機構匿名分析無眉來眼去，真定假無人知，但搵到淡友唱好，威力比起群星拱照、慣性唱好的大行分析員一字排開更大，昨日再彈4%收報96.25元，益埋通達集團（00698）同達利食品（03799），分別反彈5.9%及3.9%，收報2.33元及4.47元。

股王騰訊（00700）繼續抖氣，中字大孖沙聯群結黨，轉戰中國恒大（03333）及吉利汽車（00175）兩個大球場，仲玩得不亦樂乎。恒大連日爆發後，昨日輪番吉汽發力，升9.3%收15.14元創歷史新高。

短短一個月，兩隻中資至愛，基本因素有冇大轉變？好多股友同古勝一樣搵唔到，但股價喪升有目共睹，累升118%及41%，隨時好過唔少股友全年投資表現。

古勝