Market Insight：國企炒重組嚴守紀律

昨日突然傳神華A股及國電A股宣布獲控股股東通知籌劃涉及重大事項，並申請停牌，消息刺激神華H股（01088）及國電旗下在港上市的龍源電力（00916）及國電科環（01296）股價做好。

不過，由於今次出現的合併方案與早前盛傳的版本不一樣，即大唐並未有牽涉其中，故見大唐發電（00991）不升反跌，到底真係中空寶抑或藉重組的階段性消息來震人落車，就要做事後孔明，短炒幾時都要守止賺止蝕紀律，自己計掂自己數。

無論邊間併邊間都好，煤電企業重組合併對行業發展係好事，至少可減少惡性競爭、推動產業一體化。當然，五大電企各有各山頭，實在不容易擺平，惟有寄望中央擔當主導角色，積極推動才能成事。相關概念股中，橫睇豎睇中國神華（01088）都係實力之選，長線客唔使頭痕！

恒大炒味濃宜減磅

近期英國頻現恐襲，本周又進行大選，萬一結果選出個「跛腳鴨」政府，就真係亂上加亂，會唔會拖累英鎊匯價以致國際金融股如滙豐控股（00005）股價，不得而知，反正風險正增加，短炒開相關輪證的話，仲係及早搵位避風為妙。

內房股升勢停不了，中國恒大（03333）股價昨日再急升11%，收報15.9元；碧桂園（02007）、融創中國（01918）分別升4.4%及5.4%。恒大披露，已提前完成今年全年贖回永續債70%的目標，現永續債剩餘本金約288億元人仔，計劃在本月底前全部贖回。

求穩陣 換藍籌內房

事實上，公司旗下恒大地產上月順利完成第二輪投資引資，加上公司五月份合約銷售金額按年大增75.9%至381.9億元人仔，成功引資及資金回籠有助減輕債務，乃近期股價連番上漲的原因。

古勝始終嫌恒大炒味太濃，作為長揸有戒心，故傾向把握高位減持機會，套現轉投較穩陣的中國海外（00688）或華潤置地（01109）。

內地芬佬操盤快夾狠

藍籌股吉利汽車（00175）好似入咗無人之境，過去四個交易日由12元抽到上昨高位14.74元，市值增至1,284億元，又唔見有咩重大新聞。作為一家傳統車企，今年以來股價已累升逾九成來看，在下認為其現價估值存泡沫幾可肯定！

出現呢個局面，相信係同內地芬佬的炒作有關，升勢難以用基本因素或同業比較來衡量，亦說明箇中風險所在。

藍籌股加入咗隻炒股，福禍難料，但如今港股已是中資天下，外資芬佬都要靠邊站，面對呢類北水暴炒股，只有「睇」的份兒，唔係春江鴨，站在局外的大小戶都好難說服自己落注，呢份心情唔難理解，既然如此，就當睇少一隻。

講到能源相關股份，見到油管服務股巨濤海洋（03303）昨急升15%，收報3.24元。不過，未見其他油服股有太大波動。翻查資料，巨濤上周五發通告披露，A股公司三聚環保（300072.SZ）入主的交易已完成。不過，留意上月三聚環保被內地傳媒質疑重大合同客戶而引發股價波動。

再睇巨濤，今年以來股價由0.75元炒到上高位見3.39元，累計升幅逾3.5倍，可見無論係炒控股權易手抑或可燃冰概念，都有炒過龍之嫌，想高追要三思！

古勝