絲絲講場：滙豐派錢氹人返工

事緣滙豐控股（00005）喺英國伯明翰很難招聘到足夠人手，而滙控為滿足當地監管要求，早前決定選址伯明翰建立零售分隔銀行總部，要喺今年底前將超過1,000個職位由倫敦遷移去伯明翰，所以伯明翰嘅零售業務非常等人用，現時僅約半數職位有人手返工。

介紹入職伯明翰獎2.5萬

據了解，如果滙豐員工介紹同事去伯明翰返工，該名員工就可以獲得750至2,500英鎊（約7,540至25,100港元）特別獎賞，呢筆介紹費都幾和味呀。

其實，滙豐英國已經提供優厚租金津貼，同埋將員工仔女安排去當地最Top學校，但一向喺倫敦返工嘅同事似乎對伯明翰嘅興趣唔大囉。

推廣傳訊職位勁難請人

早前集團先有管理層透露，市場推廣同傳訊等職位要請人特別困難，佢哋呢類職位通常比較屬意喺倫敦返工。

不過，要提一提，介紹費應該只係英國同事有得攞，香港嘅同事只能「葡萄」了。

余絲韻