上兩個回合同大家探討過沽空機構於香港上下其手，拿住免死金牌狙擊科技股事迹後，做慣世界的渾水創始人Carson Block又有嘢發表啦！佢指內地信貸問題將達斷裂點，仲話明：「唔係唔報，時辰未到」喎！
不過，傳媒問他是否有計劃去做空A股公司呢？佢都很坦白，知道「打狗都要睇主人」這個道理，有時遇到一些國有的，而且是TBTF（too big to fail）的公司，他們都不敢輕舉妄動。算佢知機啦！
今個星期出來唱淡的，不單只是沽空機構，連評級機構穆迪都加入戰團！不過，作為有牌評級機構，他們一出手，便索性去搞全國，並先後調低內地同香港評級。不過，市場今次明顯不買帳，滬綜指同恒指於昨日分別升1.43%及202點，後者更再創22個月新高添！
坦白講，內地經濟走下坡已是人所共知，香港經濟同內地唇齒相依又不是第一日至知。評級機構去唱淡中港咩，股民話消息已消化晒。沽空機構去唱淡科技股份咩，就讓騰訊（00700）同舜宇光學（02382）抖一抖，換晒全板的內房上嚟囉！我兩個星期前已經話，恒指短期內會升抵25,600點，再往上的目標就是黃金比率的26,100點阻力。
我從過去經驗歸納所得，市底氣氛好唔好，係真升定假升，一睇券商股份表現就知。昨日收市，中港兩地的券商都爆晒上嚟。順藤摸瓜，下一浪應該到港交所（00388）表演喇啩！
富昌金融研究部總監 譚朗蔚（作者為註冊持牌人士，持有騰訊及舜宇）