Market Insight：中資券商股啱短炒

恒指埋單升202點收報25,631點，國指升181點報10,572點。端午假期在即，期指提前下周一就結算，托埋今日，五月累積的近千點升幅，好友應可順利袋袋平安。

A股ETF率先炒入摩

港股近日升穿兩萬五關，得騰訊控股（00700）單天保至尊撐住個市或者大家唔信，近日升勢開始擴散，內房、內銀及內險輪住接棒炒上。前日大摩品題下狂升一成七、技驚四座的中國恒大（03333），昨再升2.4%，收11.94元，短短六個交易日累積升四成二。

水往低流，昨日個別二線內房股追落後，未創52周新高的股份中，寶龍地產（01238）、越秀地產（00123）及北辰實業（00588）個勢都唔錯，如果成交對辦，可搭番轉順風車。

睇見通達集團（00698）份澄清內容，幾乎畫公仔畫出腸，生產線撳緊邊部都要講埋出嚟咁滯，可惜都抵擋唔到班空軍，彈一日又插過。與其搵暴動股趁低撈貨，假期前後仲係吼番大路比較穩陣。

滬綜指隊到3,000點邊，做咗個靚靚雙底反彈，加上大摩會否納A股入MSCI，好快會有結果，今次大摩特別將選入股份數目減少，以一個低門檻納入，氹班芬佬落疊，古勝估計A股得米機會點都超過五成，昨日南方A50（02822）同安碩A50（02823）兩隻A股ETF率先發難。

再數落去，A股守住3,000點關，中資券商股其實可以留意，MSCI有結果前睇怕點都有一段睇吓。昨日海通證券（06837）、中信證券（06030）、廣發証券（01776）、HTSC（華泰證券）（06886）及中國銀河（06881）的升幅介乎2.6至4.7%，全部低位交出一支大陽燭，短炒一於揀佢。

美國金融海嘯爆發以來，聯儲局獨沽一味狂印銀紙撐住經濟，資產負債表從海嘯前9,000萬美元左右，膨脹到4.5萬億美元，變成龐然巨物，更衍生出股市及資產泡沫愈吹愈大的副作用。

近排美股弔詭之處，唔單止對唔多對路的「特式升市」不當一回事，上周「侵侵」最新的「漏密門」事件，股市又係一插即彈，對聯儲局縮表（收水）也無動於衷，唔通應驗咗牛三特徵，當一切利淡消息透明？

弱美元利新興市場

利率期貨反映，六月份美國加息機會百分百，十年期美債息卻背馳往下走低，由三月的高峰2.65厘落到2.24厘。美金更係弱過藥煲，美匯指數縮番去97樓下，將去年十一月大選之後所累積升幅跌凸，反映債、匯商對美國往後經濟並非信心爆棚。

再睇六月加息後，去到年底前再加機會唔夠四成，唔通華爾街用望遠鏡睇路，偷步炒緊聯儲局收水後唔掂會再QE？恕在下才疏學淺唔識睇，但弱美元傳統上對港股比較有利，美元資產吸金力減弱，新興市場或者有機會翻生。近期個市慢火煎魚向上，似乎唔係挾期指淡友咁簡單。

古勝