絲絲講場：對沖基金與雞檔為鄰？
管理近200億元資產嘅對沖基金，個Office竟然就喺雞檔旁！大隱隱於市，高成咁？高就係高，不過講嘅係香港寫字樓租金。
對沖基金一向被視為賺錢之神，威到呢、型到呢……簡直係浮華世界嘅象徵，估唔到對住香港貴租，一樣要面對現實。BFAM Partners五年前揀咗喺天后商廈落腳，一落街，隔籬就係街市，活雞、活魚乜檔都有。洋人喺外國習慣每日驅車成個時辰返工，咁對於佢哋來講，Office簡直就喺雞檔旁。
中環太貴租 縮到天后
不過BFAM一啲都唔孤單，事關近年唔少對沖基金見租貴，亦一個二個同中環講Bye，轉去平啲租嘅區，就好似銅鑼灣、黃竹坑、數碼港咁。
依家中環甲級商廈，安置到10個員工嘅2,500呎寫字樓，平平哋都要月租22萬元以上！本地甲級商廈租金去年就升咗8.7%，預計今年會升多15%添。升成咁，皆因畀人搶高，去年新租樓面中有42%就係被內地企業擸咗。
查實啲對沖基金都呻，近年搵食艱難箍客緊要，喺靚區租Office又驚畀啲客覺得離地，搵平區又怕啲客嫌Cheap失信心兼請唔到人！絲絲即刻諗起一位舊友，佢當年立志要做中環金融財俊，搵工前第一樣做嘅係搬，話要先搣甩老家個屋邨地址……
余絲韻