Market Insight：資源股短線炒一轉

異動板塊方面，吉利汽車（00175）昨彈逾3%，收報11.6元；華晨中國（01114）以52周新高14.54元收市，升1.6%；和諧汽車（03836）亦反彈逾7%，收報3.36元。其實，內地汽車銷售年年遞增，到了一個水平增長放慢在所難免，但只要整體銷售保持平穩，隨着新能源車配套日趨完善，新能源車銷售佔整體汽車銷售比例漸增，改款換代亦可帶動汽車銷售，汽車股仍然係基金樂於炒作的一個板塊。每次調整得咁上吓，又可以買定等班芬佬翻炒。

最近市場對「侵侵」施政進度信心動搖。除了美股波動增加外，美元亦未復強勢。資源股有喘息的機會，昨見到鋼鐵股重慶鋼鐵（01053）、鞍鋼股份（00347）及馬鞍山鋼鐵（00323）升幅介乎2至6%。

其他資源股如水泥龍頭安徽海螺水泥（00914）、江西銅業（00358）及中國鋁業（02600）則升1%左右。到底係咪科網股呢期炒到尾聲，資金開始回流至舊經濟股不得而知。但古勝要提醒，次季內地經濟數據或轉差，跟炒資源股，最好都係走極短線，盡量避免持倉過夜風險。

彩票股或有消息跟尾

昨日市場內亦有另一個吸睛的板塊，就係冇炒好耐的內地彩票類股份。其中第一視頻（00082）股價急升58%，收報0.315元，成交達2.17億元，公司市值才10.39億元；中彩網通（08071）急升51%，收報0.62元；華彩控股（01371）則升14%，收報0.203元；御泰中彩（00555）亦升8%報0.121元。

亞博科技可望多眼

早喺前年一月，內地雷厲打貪，互聯網彩票全國停售整改，至今已叫停兩年多。今年三月財政部等五個部委曾發文再次進行巡查，惟至今未見披露進展。昨日彩票股集體異動，會否與網彩解禁有新進展，春江鴨水暖先知，作為散戶，就惟有等睇戲！

不過，在下留意到同具彩票概念的亞博科技（08279）未有異動，收報1.35元，無升跌，成交僅292萬元。為何板塊咁熱鬧，呢隻居然咁靜局，有啲唔多尋常，係咪醞釀咩消息，不妨等着瞧。如果板塊氣氛持續上升，呢隻或者可以看待成冷敲對象。

沽空機構瞄準科網股

繼瑞聲科技（02018）再遭沽空機構出招，搞到上周停牌，至今仍未復牌後，又見到科通芯城（00400）被狙擊，股價昨急跌22%後中途停牌。古勝聽啲芬佬講，瑞聲上周四停牌，冇事的話翌日應該就會復牌，至今仍在停牌，心裏當堂涼了一截。

科通成「開刀」對象

再睇科通，其實上周四股價都曾經大跌，周五略為反彈，家陣睇番轉頭，似乎真係做咗火警演習，只係嗰一刻以為係受瑞聲急跌停牌拖累，唔知道原來又係成為空軍獵物。不過，見停牌前科通的沽空未見太活躍，到底班沽空機構係點樣搵食，就留畀大家自己猜測。

到底下一隻被沽空機構睇中的科網股係邊隻，真係令坐咗貨的投資者提心吊膽。綜合瑞聲同科通芯城事件，似乎一眾沽空研究機構正針對高估值的內地科網股攻擊。所以，呢期沾手相關股份，都係盡量避免揀民企股。當然，騰訊就例外，因為有御用「獨市」金牌，唔使驚會關門大吉，畢竟呢類空軍搵食都係取易不取難，唔會同上大人對着幹的。

古勝