仲講公園舞？近年大媽至愛，係潮坐豪華郵輪！
國際郵輪協會資料顯示，大媽鍾意短Trip，平均五日左右，至愛目的地係南韓同日本。內地郵輪客五年升咗十倍，去到舊年嘅200萬人次！仲預計今後四年再多一倍以上，會去到450萬人！
大媽呢個消費群咁強勁兼有潛力，佢哋剛退休，體力同消費力都一樣仲好強，佢哋有的是時間，於是就一家大細坐豪華郵輪旅行。
各大郵輪公司為搶大媽客點敢怠慢，就搞咗啲有中國特色嘅郵輪去招呼班大媽。好似皇家加勒比國際遊輪旗下郵輪「海洋贊禮號」首航前，舊年就搵咗內地女星范冰冰做「贊禮女神」，甲板上仲有超巨型「大熊貓媽媽與寶寶」雕塑，餐廳連粥、腐乳同醬菜都有得食。
表演同樣好親切。「海洋贊禮號」就有內地相聲名星郭德綱娛賓；國產天海郵輪旗下「新世紀號」，就有《中國好聲音》參賽者表演，仲喺船上搞埋「世界小姐中國區總決賽」！不過絲絲唔明，既然食嘅睇嘅同屋企無乜分別，咁點解仲要坐郵輪呢？
余絲韻