絲絲講場：銀行語音認證畀孖仔K.O.
愈嚟愈多銀行搞生物認證，例如用指紋及語音驗證客戶身份，取代傳統密碼。但如果兩個人把聲太似，會唔會可以入到對方個戶口呢？滙豐個語音認證系統就被一對孖仔玩謝！
滙豐舊年九月喺英國推語音認證，今年三月擴展至香港，電話理財講句暗號「我有件事想搵你幫吓手」就得。
接納差異程度係關鍵
英國BBC記者Dan Simmons想試吓有幾堅，就喺當地開戶兼選用語音驗證服務。然後，Dan嘅孖生兄弟Joe就用電話扮佢把聲，試咗7次後，第8次竟然畀Joe成功登入戶口！佢哋仲將過程拍埋片上網，等大家可以親眼睇到有幾驚！
絲絲記得，花旗銀行（香港）仲早過滙豐，去年六月搶閘推語音認證，當時花旗就請咗一對孖生姊妹喺大家面前實測系統靈敏及安全度，雖然佢哋樣似聲似到連絲絲都分唔出，但就始終呃唔到花旗個語音認證系統。
明明話每個人把聲唔同，就算孖生都冇問題嘅？專家話，冇錯，每個人嘅聲紋係獨一無二嘅，問題係在於系統配對認證時嘅可接納差異度有幾大。簡單講，關系統嘅事！
密碼被盜就可以改，把聲畀人扮咗來登入戶口，冇得換把聲喎，咁點算？
余絲韻