Market Insight：基金股願賭要服輸

今鋪大龍鳳，會唔會像華爾街估計，發展到最惡劣地步，「侵侵」被彈劾落台。查實以共和黨大權在握，控制參眾兩院，除非黨友都睇佢唔順眼，否則做唔完一任，牌面上機會仲係較細。

侵侵落難 道指勢回

小弟認為，聯儲局講完縮表，個美股唔肯行，猶如老僧入定企住21,000點唔上唔落，先係最大的導火線，今次消息只係畀大家借題發揮，搵個集體出貨理據。

醫改仲可以霸王硬上弓，成功找數，跛咁隻腳的「侵侵」政府要達成列根以來，最大的一次稅制改動，既要平衡各方利益，又唔影響美國政府長遠償債能力，講咗當做咗的「侵侵」，氹到國會肯落疊先算。既然爆冷勝選後，美股夾硬嚟搵藉口炒上，道指由17,883點谷到上21,169點，唔使一半，落返三分一升幅再嚟過，都講緊二萬點邊，再插深啲真係一啲唔出奇。

騰訊（00700）季績靚仔，單天保至尊，在約1,200隻股票見紅之下，恒指埋單跌百幾點，都算係厲害，先係中金分析員食咗豹子膽，出份老千股報告（已被下架），股壇長毛不甘後人，列出半百不能買的港股，港股質素「一蟹不如一蟹」，瞬間成為熱話。

查實有番咁上下股齡，在下見識過東寧、格林柯爾、歐亞，甚至近日的輝山乳業（06863），基金股可以一夜間拉閘，total lost都已經見怪不怪，只能怪衰貪心，大家願賭惟有服輸。

不過，近期趨勢確係令人賭得唔舒服，出事股票發展去到有Q嘜保證的藍籌，近日中國聯通（00762）及瑞聲科技（02018）都有負面消息困擾，損手爛腳事少，長遠影響港股聲譽事大，查實港交所（00388）為上市把關，好學唔學，只求衝高每年集資金額排名，為逐虛名，把港股全速A股化，再係咁落去，借用達哥金句：「真係成個行業比佢搞彎晒。」

呷哺呷哺短炒一轉

尋日騰訊尾市升幅水瓜打狗，其他細價科技股，直頭山泥傾瀉，IGG（00799）插低13%，慧聰網（02280）跌6.5%，科通芯城（00400）、金山軟件（03888）都無段好睇。

騰訊季績出埋，短期好消息炒得八八九九，個市有迹象來個脫虛入實，睇番傳統舊經濟股，早幾日日本仔10億銀踩入香港食米線，嗒咗譚仔值唔值見仁見智，睇翠華控股（01314）、味千（00538）苦苦經營，譚仔賺錢能力之高，應該令行家都嘖嘖稱奇。

話時話，衣食住行真係有冇銀都開飯，中下價餐飲業，就有較不受經濟周期影響的好處，尋日隻內地邊爐股呷哺呷哺（00520）發力，破咗支旗仔升3.8%見7.8元，近排見成交有啲鑊氣，應該有條件短跑衝多一浸，不妨留意。

古勝