孖妹S檔案：Apple超級周期全攻略
「You are the apple of my eye,You are the sunshine of my life......」實不相瞞，孖妹都係果粉嚟，如果有日冇揸部「艾瘋」出街睇股價，分分鐘仲唔自在過素顏見人！之前最叻吹魔笛嘅大摩話，iPhone 8嘅換機潮會代表住蘋果公司（Apple Inc.）嘅另一個超級周期，為上下游供應商帶嚟逾6,000億元嘅總需求，呢次超級周期會唔會帶動蘋果公司股價更上一層樓？蘋果相關概念股早前因為iPhone 8消息而被偷步炒上，上周曾跳水，唔知坎坷過後係咪有艇搭？
Apple篇：新機有望刺激需求
王：科技股拆解王、易方資本投資總監 王華
彩兒：唉！我班閨密個個都話要等iPhone 8，依家死忍住唔買機喎。
王：市場對超級周期、iPhone 8有期望，佢一日未出，都證實唔到佢唔受歡迎o架，哈哈！因為預計佢會幾多新功能，當中主要有三個，佢會冇咗指紋辨識功能嘅Home鍵，被內置嘅虛擬鍵取代，令整體手機冇大到，但全個螢幕就大咗，而且會有無線充電，最關鍵係3D前置鏡頭，可拍攝物體嘅立體影像，呢個幾特別，係絕大部分手機都冇嘅。
其實，大家都怕咗iPhone十周年，Android手機備貨都唔敢備咁多，我估計Android手機需求係會下滑，而且我覺得佢延遲推出嘅機會唔大，Tim Cook（蘋果公司行政總裁庫克）喺九月中會一次過推出iPhone 7s、iPhone 7s Plus同埋iPhone 8，但其後開賣，應該前兩者會多貨啲，但iPhone 8缺貨會嚴重。
股價料已反映預期
Kitty：智能手機係我嘅陽光同空氣，iPhone 8帶嚟嘅超級周期，唔通對股價嚟講就如火上加油？
王：iPhone 8需求喺第四季會延伸至出年第一季，好明顯大家都係度等緊新iPhone，所以Android手機銷售會受明顯打擊。不過，蘋果公司股價好難講，因股價已較充分反映預期，我就傾向比較樂觀，依家都持有一啲長倉。
前景篇：iPhone十周年撐勢頭
譚：星級基金經理、中環資產投資行政總裁兼投資總監 譚新強
Kitty：其實我好鍾意iPhone嘅指紋辨識系統，秒速解鎖，啱晒下下幾百萬上落嘅人。
譚：睇番蘋果公司季績，佢好多地區銷量終於去番正數，都有人覺得中國銷售放緩見咗底，呢啲都已經唔緊要喇，依家睇得最重嘅Point係iPhone十周年，所以績後股價只係調整咗一陣就破頂咁繼續升上去，始終佢係美國公司，美國投資者對佢仍有好大信心，佢依家已衝破咗8,000億美元市值，係全世界最大嘅公司，領先地位穩固，市佔率仲係全球第二位，情況係強者愈強。佢未來更着重AR/VR方面嘅發展，有傳新iPhone會加入三維傳感器去辨認臉孔，取代指紋認證添！
彩兒：佢有超過2,000億美元巨額現金喺海外，好期待睇佢點樣大灑金錢。
譚：雖然呢幾年佢做咗好多股份回購，但好多時都係借錢去買，主因擔心海外現金回歸美國嘅稅務問題，但市場現時嘅夢就係特朗普嘅稅改計劃將會以低稅率畀海外現金回美，蘋果公司曾暗示，除咗回購股份外，會做一啲大型收購活動，市傳或者係Netflix、Disney，甚至Tesla都會係對象之一。
闖190美元非無可能
譚：新iPhone大勢所趨會用OLED屏幕，佢好大機會會要求市佔率高達八成嘅三星供貨畀佢，OLED在色彩、彈性方面取勝，呢方面嘅落後蘋果公司要追上嚟。蘋果公司喺好多方面都落後，加上手機市場已飽和，應尋求服務上嘅突破，如Apple Pay，講AI、講軟件，佢嘅Siri推出以嚟又冇乜進步，落後Amazon Echo同Google Home，真要急起直追。
Kitty：有傳蘋果公司下個月會舉行全球開發商大會（WWDC），到時就會推出「Siri音箱」，拎嚟對抗Amazon Echo，應該算係冇辜負你一片苦心啦！
譚：我覺得蘋果公司未來會傾向內部做研發設計，而唔係買技術，佢試過積極挖角，再同一間英國公司終止合作，搞到間公司股價一日跌足八成！喺記憶體業務，佢有意同Google爭收購日本Toshiba相關業務，未來喺供應上更有保障。做投資最重要唔係自己睇法，而係其他主要投資者睇法，蘋果公司股價不斷創新高，有人睇到190美元，成真都唔奇！股份上我最睇好三星、其後係阿里同攜程，蘋果公司都仲喺Top 10嘅！現時最睇好係記憶體超級周期。
概念股篇：瑞聲100元樓下博彈
趙：信達國際研究部董事 趙晞文
彩兒：大摩預計過，iPhone 8為上下游供應商帶嚟嘅需求比起iPhone7激增62%，究竟邊一間最食到條水？身為大熱Apple概念股之一嘅瑞聲科技（02018），上星期畀沽空機構狙擊，唔通「紅底股」身份就咁一去不返？
趙：我基本上仲係長期睇好佢喎，今年係iPhone十周年，蘋果公司喺第三季大機會推出新產品，可支持瑞聲新訂單，再者瑞聲旗下客戶喺聲學產品方面仲係不斷升緊級，喺非聲學產品方面，佢亦不斷推出新產品。
沽空機構對瑞聲喺財務上嘅指控理據唔強，拎佢嘅淨利潤率同微軟、Google比已經係唔合理，拎佢同非Apple供應鏈嘅A股或國際同業比，利潤同規模都會有距離，而且用純利比較都唔係一個好嘅指標。我會保持瑞聲一年目標價係120元，短線佢有機會回調至90元，中長線投資者可伺機買入，進取投資者可考慮喺100元樓下買入博反彈，但最緊要轉身夠快喇。
通達唔憂做利股價
Kitty：仲有邊隻Apple概念股係你甜心寶貝？
趙：通達集團（00698），皆因電子產品喺金屬外殼嘅比例提高咗，佢嘅防水膠產品已打入咗國際客戶，未來Keep住會推出新產品；未來新iPhone以至其他電子產品都趨向無線充電，集團生產嘅金屬中框渴市，同步支持佢中長線增長，不妨等佢回調至2.6元買入，半年睇3.14元。
彩兒、Kitty