絲絲講場：「翻案高手」李君豪教Say No！
李君豪昨日正式退任香港交易所（00388）董事，佢係港交所任期最長嘅董事之一，足足做咗17年，即係港交所上市以來，佢一直都係董事至今。臨別贈言，李君豪寄語新董事，「如果有不同嘅觀點，一定要在董事局出聲！」
做咗港交所董事17年
點解咁講？原來過去港交所有幾單極具爭議嘅政策，原本在董事局內差不多「大局已定」，最終畀李君豪「翻案成功」！好似多年前收窄買賣差價第二階段，原本董事局內12比1要通過，但佢提出理據極力爭取，最後推翻。
妙喻細經紀散戶似蚯蚓
又好似早年嘅收市競價時段，當時李君豪係唯一不同意嘅董事，結果收市競價因滙豐控股（00005）遭大幅「嘜價」而叫停。直到去年才推出「改良版」嘅收市競價時段。所以，李君豪好鼓勵啲新董事，如對提出嘅政策不同意，一定要出聲！
李君豪離開港交所董事局後，將再無中小經紀喺董事局內，佢話交易所有唔同嘅持份者，大中小經紀都好重要。他仲話，唔好睇小中小經紀、散戶等，佢哋其實好似蚯蚓咁，雖然好細小，但原來蚯蚓對疏導農田同種植有好大作用，所以佢希望政府及港交所將來在委任及提名董事方面更加平衡，多啲本地業界人士入局。
同時，李君豪亦坦言，擔心一啲證券市場前線運作嘅細節或竅門，如果不熟悉，會作出不太理想嘅決定。
余絲韻