「侵侵」今年一月二十日正式上任美帝揸fit人，同我細仔出世日期只差幾日。近日當我籌辦我個仔的百日宴時，我也在想，到底「侵侵」於自己的百日宴上會交出一份怎樣的成績表呢？
於過去100日裏，我們聽得最多有關「侵侵」的報道，不外乎是滑鐵盧同彈弓手。綜觀他於當選後許下的承諾中，比較宏大而是真正做到的，好似只有退出《跨太平洋夥伴關係協定》（TPP）一項。咁其他呢？
他講過要喺美國同墨西哥邊境起一道牆，結果墨國總理公然反佢，叫國內企業唔需要驚佢。「侵侵」反穆斯林反到出晒面，企圖用禁令來驅逐1,100萬名非法移民，結果，起碼有七個州獲法院頒布暫緩執行禁令。
上任之前的「侵侵」，好憎三個人，頭號是奧巴馬。他於罔顧民意真心擁戴「奧巴馬醫改」的情況下，仍決意廢除，結果於國會表決前一刻，他了解到自己了無勝算，便提出了取消表決，到目前睇怕已經擱置喇。
第二個要剷除的人是耶倫，原因是她太鴿，阻礙了利率正常化！結果，「侵侵」上月就反口話耶倫於任期屆滿後未必不可以連任！至於中國呢？「侵侵」同習大大不知幾friend，做任何事都有商有量，還煲電話粥添，包括傾下點對付金仔！匯率操縱國？咩嚟？食得嫁？！
今個星期六（二十九日）就是「侵侵」上任的第100日喇！So far他對美國又有甚麼貢獻呢？照咁睇，「侵侵」急需要一次成功，要不就是去打金仔打到落花流水，要不就是立即通過稅改的法案。
兩件事對港股來說，一個是大利淡，一個是大利好。因此，大家可以做定準備，恒指要於短期出方向了。
富昌金融研究部總監 譚朗蔚（作者為註冊持牌人士）