Market Insight：中軟國際獲北水眷顧

事實上，見到近期內地大喊要加強金融監管，A股跌，但香港的內銀內險股都好硬淨；樓價高企，本地地產股短線調整過後有力再上；騰訊（00700）股價迭創歷史新高，升完10蚊又10蚊，半年結前叩250元大關應該無懸念。

講到騰訊，話時話前年港股大時代以來，冇買樓唔緊要，有買騰訊都經已穩陣一倍有多，畢竟睇好中資股要買佢、睇好科網股要買佢、睇好港股都要買佢！班大戶都算買得克制，邊壓邊收，亦可以推斷呢隻股遠遠未見頂。

再睇隻IGG（00799），晒士細好多，但正因如此，有內地資金炒起升勢可以來得好快，三月初股價才喺5.3元水平，昨日高位已見11.54元，話咁快就翻一番。而互聯互通份花紙亦顯示，北水持倉由上月中旬的5,400萬股增至近日的1.13億股。

講開花紙，無意中發現北水喺中國軟件國際（00354）的持股數目，由三月中旬的1.28億股增至1.78億股。中軟國際昨日收報4.68元，升3.54%。睇圖都似在醞釀突破，一旦成功抽穿4.7元水平阻力，有望行轉快上5至5.2元區域，初步支持喺4.45元。

巨騰暫難扭轉弱勢

從事電腦存儲及周邊設備的巨騰國際（03336），昨日亦見異動，股價一度高見3.05元，收報3.04元，升12%，成交2,631萬元。

查實呢隻股股價反覆回落都有三年，主要由於行業競爭大，毛利率受壓，加上主營的筆記本型電腦市場出貨量下跌，以致旗下相關的外殼銷售亦受拖累，已公布去年純利大跌42%至5.01億元。

今年初巨騰股價由2.3至2.4元水平，反覆回升至上月高位見3.39元才掉頭回落，前日仲插過落2.67元，昨日突現買盤承接，一口氣收復3元大關，暫作反彈視之。

由於其20日及50日線均處約3.05元區域，若今日未能高開突破，慎防回吐出現，失守2.95元可能要回試2.8元水平承接。

事實上，除非業績有起色，或者業務有何戰略突破，否則以估值論股價暫難脫弱勢，暫宜觀望。

後市向上機會頗大

三家中資電訊股，中國聯通（00762）一系的混改，已決定從A股公司起始，鐵塔公司年內分拆上市亦有望在季內有新進展，消息有利板塊估值。

若然明晚美國公布原油庫存數據後，油股未受負面影響，橫睇豎睇，整體藍籌股都係向好的居多，指數都係做上比做落容易，再睇埋昨日恒指以全日高位收市，睇嚟在排除東北亞現炮火聲的可能性下，後市再上的機會頗大。

大戶力吸華電福新

外資參與度低迷的港股，幾乎已轉莊由中資主宰後向。有北水眷顧的個股就有運行的說法，應該冇咩異議。睇股權披露資料，留意到一隻北水買緊的股份，就係華電福新（00816）。

中國再保險（集團）自四月十二日首次披露持有華電福新逾5%股權後，四月十三日、十八日及十九日分別入場再掃入2,717萬股、2,120萬股及1,698萬股，凡四次披露平均價介乎1.679至1.703元。

華電福新昨收報1.74元，升2.96%，成交6,858萬元，乃自三月下旬以來首次重上20日線。睇圖今年以來股價波幅介乎1.6至2元區域，且看在大戶力吸貨源下，季內能否突破波幅區。

古勝