絲絲講場：一田逆市開店請400人
香港零售仲係立立哋，但係作為逆市奇葩嘅一田百貨一早定咗今年會一口氣開3間新舖，繼年初開咗西環店後，將軍澳新店亦即將於七月開業。加上嚟緊五月底嘅半年一度優惠日，一田尋日更舉行招聘日，希望請到約100個長工及約300個臨時工。
年輕人應徵排大隊
絲絲之前都聽過一田工作環境同文化相對開心啲，所以尋日睇到現場都有近100人等候招聘正式開始，當中有唔少係年輕人。
至於大家等住掃平貨嘅優惠日，今年都係最低一折起。CEO黃思麗就話，因為沙田舖裝修嘅原因，今年首次加開九龍灣國際展貿中心同埋將軍澳東港城臨時場，希望整體生意額都有按年3至5%嘅增幅喎。
余絲韻