絲絲講場：鞋王Jimmy Choo賣盤
相信有睇過《色慾都市》（Sex and the City）嘅女仔都對Jimmy Choo高踭鞋趨之若鶩！呢間奢侈品牌嘅鞋履製造商Jimmy Choo尋日宣布尋求賣盤，仲話會審視各種策略選項同買家，務求將股東嘅利益極大化咁話，呢個計劃目前已得到控股股東JAB Luxury支持，相信交易將會喺夏季結束前完成。
控權頻易手 愈壯大
Jimmy Choo品牌除咗喺《色慾都市》亮相而爆紅，原來多位皇室成員係佢嘅貴客，當中已故戴安娜王妃就係「粉絲」之一。
呢個品牌喺一九九六年，由馬來西亞華人設計師周仰傑Jimmy Choo所創立，之後周仰傑離開Jimmy Choo，公司控股權喺過去十多年仲易手過好多次，不過Jimmy Choo品牌價值愈做愈大，近年仲將業務擴展到高級男裝鞋履，加上受惠於大陸豪客嘅青睞，知名度與日俱增，可謂歐美品牌界嘅異數。
英股價曾抽升逾一成
有消息人士透露，JAB Luxury揸住Jimmy Choo股權68%，不過因為已經唔想再留喺奢侈品市場發展，所以只視佢為邊緣資產，而最近絲絲見到JAB開始轉戰食品同咖啡市場，仲喺今個月用72億美元收購麵包咖啡連鎖店Panera Bread。
消息傳出之後，Jimmy Choo股價喺英國股市早段曾經升咗10.09%，至185.5便士，市值約7.023億英鎊。
Jimmy Choo喺二○一四上市之後，因為奢侈品市場吹淡風而飽受挑戰。不過，隨住旗下中國業務增長，佢嘅股價喺二○一六年錄得反彈，今年股價更持續高過當年嘅招股價140便士。
余絲韻