孖妹Ｓ檔案：大媽炒股網 活用有錢途

玩雪球網3年：互動強 集民間智慧

市：散戶Blog王 市場先生

彩兒：你一四年開始進駐雪球網，成為分析專家，依家粉絲數目都有4萬幾人，嘩，好勁喎！

市：當初開始喺雪球玩，係因為發覺普通Blog嘅互動性不足，普遍若然有兩、三千個讀者就已經好勁，而且香港冇一個平台提供個股討論，當時發覺有幾個Blogger朋友，除咗喺自己個Blog之外，仲會喺雪球分享，所以我就跟住試吓，最初係以分析A股為主，後來就慢慢講番自己最愛嘅資產折讓股。

獨家行情唾手可得

市：雪球有度好，佢除咗網頁版外，仲有埋手機App，搭車或者喺街一諗起有乜好嘢，都可以即刻打幾句同粉絲分享，唔同寫Blog咁長篇大論，而且仲可以即刻睇吓啲回應添。

Kitty：老老實實，上面有咁多專家同網民推股，有冇試過跟貼士買股賺錢先？

市：入面有好多網民鍾意提供分析，其實呢啲就等同民間智慧，唔同嘅股份原來喺民間都有專家，佢哋會用網名、筆名出分析，每隻股都會有重心分析佢盤生意同箇中嘅資訊……你諗吓，香港有好多股都係同內地有關，好似內房股咁，佢啲盤喺大陸，內地網民仲熟過你啦，分分鐘個盤就喺佢屋企隔籬！樓盤質素好唔好，可能佢就係用家呢！

市：我會喺雪球搵投資靈感，最近有雪球嘅網友叫我睇香港建設（00190），跟住我就自己再深入睇佢業績，其實佢PB（市帳率）好低，研究嗰陣只係0.2倍，我其後就分段買入，平均價係4.51元，依家佢係我三大持股之一，其餘兩隻分別係建業實業（00216）同埋彩星集團（00635）。資產折讓股佔組合超過九成，年初至今整體組合回報有18%。

小心判斷 獨立分析

彩兒：有冇人試過畀啲財技股你「歎吓」？

市：咁又唔會喎，因為大家都係價值投資者先會走埋一齊，網友覺得股份平又啱我風格先會問我意見，同埋有時佢哋見你嘅研究資訊有價值，就會用打賞功能去支持你，特別喺大時大節會有紅包，功能推出至今收到兩千幾蚊左右。

呢啲討論區資訊有真有假，任何平台都會有人別有用心去推不良資訊，所以你永遠要自己再做分析，唔可以預期有人幫你做過濾，最重要係建立自己分析能力，我總係覺得，投資應該捨難取易，簡單就是美，我就傾向揀投資資產嘅股份，多過追求盈利嘅股份，睇前者你可以實地考察，如果佢中環有幢商廈，你就可以去睇吓，留意水牌，就可以知道租戶質素；後者就要諗埋佢點搵錢，咁就複雜好多啦！

玩雪球網半年：「球友」動態一目了然

巴：投資Blog「巴黎的價值投資」Blogger 巴黎

投資Blogger巴黎稱，享受閱讀球友分享的大師級投資哲學文章。	內地最Hit投資網係邊三強？	內地股友唔會信晒投資網

Kitty：你喺雪球網打滾大半年，就有兩萬幾個粉絲，點吸粉絲，你係偶像派定實力派？

巴：當時都係市場先生介紹我玩嘅，內地投資討論區嘅港股討論，比起香港同類嘅討論區仲熱鬧，雪球係幾吸引嘅，因為佢可以做到一站式資訊，佢叫「動態」，每日會好似臉書咁更新，內容會包括你追蹤咗嘅球友們正在討論嘅文章，佢哋關注咗嘅股票，同埋市場上有關你個人組合以及關注股票嘅新聞，另外仲有佢哋嘅公告。

雪球首頁「頭條」欄目，每日都會登出一啲有水準嘅文章，其中都包括球友寫嘅，一旦文章被揀中成為頭條，就會吸引其他球友關注，我個人有唔少文嘅點擊超過十萬，有啲更加有三十幾萬，同一篇文放喺Blogspot可能只得兩千人睇。

除咗「動態」頁外，仲有必備嘅「市場行情」同「個人組合」，呢個組合係公開畀其他球友睇，若做得唔好，好快就會畀人知道。有時睇球友評論，我都會檢查對方嘅組合表現係點，例如回報係點，係咪夠分散，若高回報但只得一隻股嘅話，我通常都會敬而遠之；若對方嘅組合分散又有好回報，就有說服力，畢竟股市始終要實戰決勝負，如果口若懸河似層層，但連組合都冇個，始終差啲啦。

純粹討論 保持謹慎

彩兒：內地唔少投資資訊網引到大媽炒港股，當中有唔少北水觀點，你有冇試過中伏？

巴：我希望透過雪球更了解內地A股市場，個人較為小心，目前為止仲未試過因為呢啲討論而去買股票，我會更享受睇球友分享嘅大師級投資哲學文章，投資講求思考能力，呢方面嘅閱讀幫到我唔少。

價值投資呢門投資法喺香港算係小眾玩意，好似我咁硬頸嘅方法就更難流行，不過，喺內地就算唔興，人夠多嘛，所以只玩大半年就有呢個數目嘅粉絲，好有鼓勵。

彩兒、Kitty

若有料報畀彩兒同Kitty或有嘢問，可電郵money.biz@on.cc