Market Insight：科網股跟炒要靈活

古勝都講過，通街主動式基金睇住隻騰訊做人，升時貴一貴都追，要回的時候先沽而後快，基本因素雖然無變，但TMT股玩家要睇實隻騰訊momentum去做，二、三線副選更加要識睇勢，唔對路要懂得避一避先好。

中國首季GDP增長6.9%超額完成，但之後A股跌多升少，股市潛台詞話畀大家聽，既然阿爺今年餘下時間穩增長壓力無咁大，一直得個講字的去槓桿、去產能，可以加多兩錢肉緊去做。

事實上，郭樹清上任中銀監主席仲未滿月，即見拋出七份加強銀行規範，增強銀行業監管的文件，整治影子銀行問題開始全面推進。由於內銀佔國指比重唔嘢小，也形成近日國指有秩序向下。

如果本周再穿一萬點關，可以宣布短期反彈已完成。幾隻啱啱面世的國企指數反向ETF，如南方國指反向（07388）、未來資產國指反向（07362），不失為合時的賭跌工具。

港美股市似山雨欲來

上周五恒指跌14點，全個星期計恒指跌219點。整個四月份，恒指在23,723至24,400點之間上落，如果今個星期繼續未見突破轉向單邊市，四月將會成為踏入今年以來上落最窄幅的月份。

Frexit構成更大威脅

金融海嘯以來，危機一浪接住一浪，舊年Brexit及美國總統大選，結局出人意表，更意外是金融市場之後的反高潮。上周法國恐襲，令選戰吃緊的總統選舉更難預測結局。對被譽為「女版侵侵」；打右翼民粹旗號的瑪琳勒龐一旦當選，分析都估計會使法國步英國後塵，引發公投最終導致Frexit的結局。

與英國唔同，作為歐盟第二大經濟體，二哥法國唔玩的風險，肯定比一直與歐盟口和心不和的英國嚴重，漣漪效應更是難料。但奇怪是，近期美股及港股都呈現異常低氣壓，悶到得人驚，是否暴風雨前夕不得而知，執筆時未知大選結果，但今日開市前大家應可從新聞得知發展，入市前先記緊留意。

大家食住花生睇有線

怪事年年有，今年特別多，無幾耐前由多名潛在買家洽購到最後影到無，講到熄燈咁滯突然又見轉機的有線寬頻（01097），最後以供股（大股東唔供）告終，變相低價股權轉讓。有線九九年以10.39元上市，依家每股供0.21元，連當年零頭都無，足見證收費電視行業的興衰。

全購幻滅，要面對三供五的大折讓供股，博大孖沙入主的捧場客，恐怕無得揀，上周五都會壯士斷臂。吊詭是，復市開低兩成以0.485元打開逃生門之後，成朝有線喺五毫子定住，午後逐級掃上高見0.77元，低位彈五成八，埋單收0.71元，成就過山車一樣的走勢，創完52周低，再創一個月新高。

有線街貨5億股，全日賭枱上turn到5.45億股，間公司碌咗一轉，前景未明加上供股折讓極大，咩葫蘆賣咩藥？就已知資料完全超出合理推斷範疇，沾手就無謂，但後續發展可以當戲睇。

古勝