Market Insight：水泥股可穩中求勝

外圍因素影響較少

英國突然宣布提前大選，英鎊短線有得彈，但長遠則福禍難料。畢竟提前大選，保守黨係有贏面，但唔係包贏。再講，理論上若然保守黨勝出，市場憧憬有助統一國內聲音，加強與歐盟商討脫歐條款的牙力，但所謂的「軟脫歐」如意算盤打唔打得響，係兩回事。總之脫歐係大方向，討價還價過程漫長，都係見步行步。

今夏外圍不明朗因素甚多，專門做內銷的中資股，勝在冇咁受外圍因素直接影響，風險因素相對容易掌握。好似水泥股，一個雄安新區的建設，料可帶動建材需求，再加上雖然中央調控樓市，但未有阻止興建樓房，反而是鼓勵供應滿足剛需。

在城鎮化持續之下，房屋建設和需求亦沒有停止過，建材行業經歷近幾年產銷調整之後，其實近年基調已有改善，今年展望穩中有增。次季股海風高浪急，想揀啲易圍數的板塊，水泥股可以考慮吓。

海螺潤泥屬必然選擇

翻查資料，年初至今，建材水泥股遍普有不俗升幅，其中亞洲水泥（00743）累升39%、安徽海螺水泥（00914）升30%、台泥國際（01136）升43%、金隅股份（02009）升57%、西部水泥（02233）及中國建材（03323）分別升32%及43%、華潤水泥（01313）則升44%，正正係市場重估板塊的結果。

從龍頭股入手，首選離不開海螺水泥及華潤水泥。論走勢，海螺水泥次季走勢料會維持喺25至30元區域上落機會大，有意入貨者不妨候低行動；華潤水泥股價受制於4.5至4.6元水平，短線可能要先在4至4.1元水平整固過後，再有力嘗試突破。

至於中小型的選擇，亞洲水泥及台泥都係台資背景，其中台泥早前掌舵人遇意外過身，雖然其後高管調任已穩住局面，但往後也不能完全排除被併購的可能性，所以若要二選其一的話，除咗博行業景氣回升之外，也許後者可以有多一份憧憬。

彈珠股趁淡市發圍

正所謂生意淡薄，不如賭博！昨日見到彈珠機股有景，NIRAKU GC（01245）股價最高上過1.16元，收報1.14元，升5.5%；DYNAM JAPAN（06889）高位見14.88元，收報14.86元，升3.3%。雖然兩者成交未算太活躍，但都有個勢逆市發圍，值得望多兩眼。

吉汽反彈有保留

睇番兩股走勢，其實三月下旬開始有一浪，升到上本月初見頂回落，到昨日有番啲起色，但成交未復舊觀，故暫只宜以反彈浪視之。短線NIRAKU GC 10日線阻力在1.2元，成功突破目標再試月初高位1.38元，否則暫宜觀望；DYNAM反彈較大阻力則在15至15.3元區域。

此外，昨日提到汽車股調整浪，就見到吉利汽車（00175）有反彈，最終高收11.28元，升6.4%，主要係受公司推出新高端品牌的消息刺激，投行大和同高盛亦發表報告唱好。不過，睇圖近日吉汽股價10日失守50日線，走勢轉弱。

古勝都係維持睇法，即留意今浪汽車股反彈力度未必太多，有咩唔對路要識得及時落車，以吉汽為例，是浪反彈未能重上11.5元都係無謂手多，候回試10元承接再作考慮。

古勝