絲絲講場：黃國英遊北韓撞正金仔閱兵
著名基金經理黃國英（Alex）喺復活節假期間帶團遊神秘的國度──北韓！咁啱撞正北韓太陽節舉行大型閱兵，美國副總統前赴三八線，中國更停飛北京至北韓平壤航線，搞到絲絲都一度替Alex同團友擔心，好在最終大家平安歸來！
Alex仲同絲絲分享難忘旅程！話說最令佢印象深刻係北韓嘅女導遊，剛剛出身，好想做得好，但又缺乏經驗，十足日劇啲「熱血」主角！Alex仲大讚北韓嘅雜技團，後空翻騰、空中飛人……只能用「勁都嘔」三個字來形容，相信全世界冇邊度地方會咁認真訓練到咁勁嘅雜技團咁話！
閱兵期間當地四處封路，啲路又唔平坦，成程車開得又慢又震，最好笑係有位團員戴住嘅小米手環，將部分車程顯示為步行咗20公里路，可想而知坐車同行路都冇大分別！
余絲韻