絲絲講場：歷史珍藏睇盡永隆80年
絲絲今日透過珍藏帶你速睇港銀歷史。至今有逾80年歷史嘅永隆銀行係其中一間由華人開辦嘅港銀，○八年被招商銀行（03968）所收購。時至今日，永隆銀行大廈仍存放咗唔同年代嘅銀行物品，Show啲畀大家睇。
用四萬四蚊開業
今時今日四萬幾蚊算得係乜？但喺一九三三年，呢個數額已夠開辦一間銀行。永隆創辦人伍宜孫當年就以44,500元開辦「永隆銀號」，舖址位於文咸東街37號，初期只有12個職員。
一九四五年二次世界大戰結束，黃金交易變興旺，當時永隆亦有出金條同金粒，仲係逐件人手打印記。
依家就講Internet Banking，戶口連存摺都冇，莫講話打簿習慣。但喺50年代嘅銀行存摺，有啲仲用毛筆書寫紀錄。嗱，笑人老餅前，睇睇自己識唔識得晒啲中文數字大寫先講。
去到60年代，永隆出售嘅禮券面額只有10元及30元。當年10蚊唔小嘢，嗰時搭巴士只係兩毫子！
送火柴錢箱畀客
銀行送紀念品畀客戶，依家多數係鎖匙扣、原子筆咁。原來喺60至70年代，銀行會送火柴做禮，火柴用途多，兼且當年多人食煙啩。銀行仲會送錢箱同紙間尺，見到興奮都唔該忍住，否則閣下貴庚即知。
余絲韻