孖妹S檔案：季績放榜期精選贏錢股

最受惠經濟復甦：中國海洋石油（00883）目標11.2元

擺脫績差陰霾 值博

鄧： 業績翻身股係我今季熱選，中國海洋石油（00883）會係其中一隻，佢二○一六年業績當然係差啦，盈利倒退逾96%，但情況好得意，公布完業績後，喺三月尾佢股價就反彈，最主要係業績充分反映最差嘅時間已過去，一六年上半年係蝕緊錢，但下半年係賺緊錢。

星展鄧威信稱，蒙牛今年首季業績應可持續有改善。	耀才植耀輝相信，騰訊股價有力在年內挑戰二百五十元水平。	鼎成李明正表示，松齡業務概念獨特，市場上少有同類選擇。

油價之前已搵到底部，布蘭特期油喺46美元附近係一個幾強嘅支持，主因環球經濟復甦之前好依靠美國帶動，現時不少成熟或發展中嘅經濟體，例如歐洲、中國，以至巴西，經濟數據開始好轉，可見今次係全球性嘅經濟復甦，喺再通脹下，有望帶動商品價格上升，中海油首季業績有望持續向好。

Kitty： 近期成日講打仗，搞到「驚青資金」走晒入金礦股同三桶油，中海油都已經着着哋火！

鄧：星展銀行（香港）高級證券策略顧問 鄧威信

最飲得杯落：蒙牛乳業（02319）目標17.45元

營運好轉 畀次機會

鄧： 最差情況已過嘅轉勢股，我覺得業務有明顯好轉，蒙牛乳業（02319）係其中一隻，雖然股價冇中海油咁落後，但睇番佢一六年業績，喺業務上做咗撇消，最差嘅嘢浮咗面，所以今年首季業績應可持續有改善，睇番佢本身嘅業務，如高質奶品特侖蘇，其實銷售上增長保持唔錯，可拉動毛利率。

彩兒： 近年蒙牛殺入香港超市同便利店，我平時都有飲開。

最叻追落後：中國電信（00728）目標5.1元

開支及成本齊望降

鄧： 內地電訊股落後於大市好耐，市場機構投資者持有比例較低，佢跑輸大市咁耐，今年終於有啲契機，業績會轉好，其中最主要係之前整合咗鐵塔資產注入鐵塔公司，鐵塔公司年中打後有望上市，電訊商會有資金回籠，對中國移動（00941）、中國聯通（00762）、中國電信（00728）都有幫助，相信對後兩者影響大啲，因為回籠資金佔佢哋總資產值較大，共用鐵塔資產下，未來資本性開支及營運成本都會減低，業績都會有所好轉，但就未至於首季就嘭嘭聲上。

Kitty： 聯通同中電信密密斟，仲拖手仔推「全網通」手機，唔知中移會唔會嬲嬲豬？

植：耀才證券市場研究部總監 植耀輝

最High-Tech：舜宇光學科技（02382）目標60元

出貨量飆5成 唔憂做

植： 舜宇光學科技（02382）三月手機同車戴鏡頭出貨量，分別按年急升54.8%同59.9%，手機照相模組出貨量亦達47.1%，受惠市佔率上升因素。因為今年係iPhone智能手機誕生10周年，加上三星S8出貨量又報捷，反映行業前景仲係唔錯。另外，依家手機都會配置雙鏡頭，亦有利集團發展，舊年該公司盈利急升66.8%，相信今年首季會繼續有好表現，可等52元以下作中線部署，上望60元。

彩兒： 舜宇年頭起似足用咗氮氣加速咁勁飆，好多股友望住股價O晒咀。

最巨無霸：騰訊控股（00700）目標250元

幾瓣業務具爆炸力

植： 騰訊控股（00700）係我愛股之一，我揸緊佢！睇好最主要係因為過去多年業績維持高增長，舊年盈利增長去到42.7%，同時微信箍住龐大用戶群，依家每月活躍用戶（MAU）已接近9億。仲有，集團舊年收購Supercell後，手遊收入預計大幅提升，近年亦加強移動廣告及視訊方面發展。隨住微信用途變得咁多元化，未來商機仲大，現價雖然估值唔低，但念在增長動力仲咁高，相信股價有力喺年內挑戰250元水平。

Kitty： 呢隻企鵝仔上星期股價又創新高，不枉咁多股友撐佢！

鄧：星展銀行（香港）高級證券策略顧問 鄧威信

最有藥力：石藥集團（01093）中長線持有

9.3元樓下不妨入市

植： 石藥集團（01093）舊年盈利增長26.2%至21億元，主力產品好似恩必普、歐來寧等表現仲好勁，抗腫瘤藥多美素及津優力增長潛力都唔弱。自畢井泉一五年擔任國家食品藥品監督管理總局（食藥監局）局長後，藥品審批速度明顯加快咗，舊年食藥監局就對146個有明顯臨床價值嘅創新藥、臨床急需藥、專利過期藥同國內首仿藥實施優先審評。內地大趨勢基本上係將更多普藥同創新藥納入國家基本藥物目錄，減低番市民嘅醫療負擔，雖然廠商利潤有機會受壓，然而有更大機會出現「以量補價」嘅情況，可以等回落至9.3元以下買入中長線揸。

彩兒： 有魚缸傳說話「弱市炒藥股」，唔知靈唔靈？

最穩打穩紮：濰柴動力（02338）中線持有

首季盈喜機會料高

植： 今年首季全國重卡銷量累計同比大增93.02%至28.4萬架，單月計同比增長達53.36%。濰柴動力（02338）主力生產同銷售柴油發動機，相信可受惠於大幅增加嘅發動機需求。集團舊年業績已有生性表現，盈利按年急升72.9%至24.4億元人民幣，今年首季發盈喜機會相當高，加上母公司濰柴集團亦有混改概念，所以可候低吸納中線部署。

Kitty： 佢舊年派高息送紅股，冧得股東咁高興，希望今年Keep住！

李：鼎成財富管理行政總裁 李明正

最好玩：聯眾（06899）目標4元

轉型成功 業績睇好

李： 內地手遊行業近年愈來愈多參與者，隨住內地國策支持電競行業，通過直播系統配合可以收門票收入，成為新嘅生態環境，有幾多因素造成，九十後社交傾向以網上途徑識朋友同認識世界，容易組成朋友圈係大勢所趨；IT技術成熟、網絡提速降價減少手遊成本，移動系統支付支持及慣用性令用家容易付費。

聯眾（06899）係中國其中一間最早嘅線上遊戲服務供應商，現時有約200隻遊戲，近年轉型成功，轉向手遊，佢係內地第二大棋牌遊戲服務供應商，棋牌遊戲好啱電競，令用戶人數急增，佢估值低於同業，預計今年業績會繼續向好，可以2.8元收集，目標價4元。

彩兒： 唉，我班姊妹成班都係低頭族，唔怪得佢咁好搵……

最敬老：松齡護老集團（01989）目標1.3元

概念獨特 吼1元收集

李： 我都會幾睇好銀髮消費概念股，食住人口老化嘅趨勢，今年上市嘅松齡護老集團（01989）掛牌後旋即熱炒，主因銀髮族有消費能力，同埋對生活嘅要求提升，松齡業務概念獨特，市場上少有同類選擇，佢亦有意收購合併其他同業，發展具規模嘅管理，顧及行業需求強勁，前景潛力大，雖然因佢啱啱上市，有上市費用之下，首季業績唔會太好，但可以考慮等1元附近收集，長線持有，今年目標係1.3至1.4元。

Kitty：希望呢隻股可以生生性性啦！

若有料報畀彩兒同Kitty或有嘢問，可電郵money.biz@on.cc