Market Insight：金飾股短炒見好識收

政治動盪壓抑消費

內地公布的首季GDP增長6.9%，較預期強勁，是否意味經濟已重拾升軌，仲係言之尚早，但至少可以對次季兩地市底起到一定支持作用，在北韓問題漸趨緊張之下，呢份支持有總好過冇。

放完復活節假，接下來好快又有五一及佛誕假期。上周四見到金飾股炒起，周大福（01929）股價創52周新高8.5元，收報8.36元，升5.8%；六福集團（00590）同創52周新高27.75元，收報27.6元，升8.2%。除咗係時值長假消費市道受關注之外，周大福公布上季度同店銷售額及整體銷售額均錄得不俗增長之下，獲大行唱好，亦成功帶動板塊氣氛。

不過，要留意嚟緊五一勞動節，內地A股僅休市一天，翌日復市，所以甚麼黃金周概念未必起到作用。加上短期地緣政治風險上升，金融市場波動難免，對消費市道可能亦有壓抑作用，故短炒有利潤要見好識收。

壞消息唔散 搵位入市

睇相佬呃你十年八年，大選期間已信口雌黃的美國總統「侵侵」，入到白宮凳都未坐暖，經已露底。如佢率先預告唔會將中國列為匯率操控國，與選舉期間主張來個一百八十度轉軚。的確，「侵侵」舊年勝選，大家預咗今年經濟時局能見度低，但點都估唔到其行為態度可以反覆到咁。

「習特會」期間美國向敍利亞空襲，個市唔散，上周北韓地緣政治升溫，一樣係唔肯落，股市於壞消息企硬。睇番港股由海嘯近三萬二點，撻到萬一點樓下，經過美國三輪量寬，一○年反彈最叻見過24,988點，往後日子，這蟹貨區阻力陰魂不散。

每次恒指反彈到兩萬四、兩萬五之間，都自動發軟蹄，只得一五年港股大時代，在內地莊家與大媽不理性地南下掃貨才出現過短暫突破。家陣恒指再舊地重遊，壞消息下唔散，五月開始炒A股入MSCI。雖然美股受北韓局勢緊張影響，走勢波動，短期港股亦受影響，但不妨留意低位支持，話唔定第三季食粥食飯就睇呢個月搵唔搵到靚位入市。

潤啤併購成催化劑

若想布置A股入MSCI概念股，當從大價股入手。長假前見華潤啤酒（00291）異動，股價一度衝過上19.54元創52周新高，收報19.44元，升3.2%，成交1.39億元。

呢兩年內地經濟增長放緩，就連消費市道都受到影響，同屬啤酒股，青島啤酒（00168）股價由一三年十一月高位68.3元反覆回落至去年低位僅25.35元，過往的高估值已不再。其他飲料食品股如中國旺旺（00151）及康師傅（00322）亦告別高估值年代，以一四年高位計，至今累跌幅度最多達六至七成。

反觀華潤啤酒，受惠於央企改革，期間向母公司出售非啤酒業務，由一家業務周身刀但冇張利的大紅籌，變成一家主營啤酒業務的企業，估值明顯改善，重獲大行垂青，股價成功跑贏同業。走勢上，若然短期股價回吐企穩18元樓上，下一阻力位上移至20至22元區域，上升動力可能來自併購同業的消息。

古勝