北水頭等倉：系內混改聯通逢低收集

中美關係將會如市場想像般糟糕，抑或係前所未有的友好，當要視乎中國可以為此付出多少利益。

上周五國際事件震驚全球金融市場，金價油價向好，股指波動。港股上周五一度失守24,000點關，尾市跌幅收窄，恒指收市僅跌6點報24,267點，都算硬淨。當日經滬、深港通有28億人民幣北水入場撐港股。

藍籌以中國聯通（00762）表現最佳，收報10.96元，升4.98%，「三桶油」亦高收作結。到底美國行「開火」呢步棋，中東局勢一旦惡化，唔知有幾長手尾，會唔會令資金流出美股，回流新興市場，不妨放長雙眼等着瞧。

墨龍股東不宜戀棧

講起聯通，上周停牌後復牌，披露母公司會在A股控股股東聯通A股（600050.SH）作為混改平台，但未有提供方案細節。其實，以A股公司為平台亦係正路，因其實現時A股公司只係一家間接控股公司而已。無論如何，既然聯通系混改已有一個時間表，都係一個好消息，皆因混改有望達致提升營運效率，並透過多元化股東基礎，開拓更多與科網的商機。所以筆者認為，中線聯通股價可望跑贏中國移動（00941）及中國電信（00728），可逢低收集。

順帶一提，山東墨龍（00568）業績大走樣，其A股（002490.SZ）涉嫌違反證券法規而遭立案調查，更有退市風險，所以上周五起已剔出港股通標的名單。

冇咗北水護蔭，加上業績咁差，小股東都有感被搵笨，遇股不淑惟有壯士斷臂搵個第二個目標，千祈咪鬥氣磨爛蓆。

司慕渢