絲絲講場：證監會內 堅有「惡犬」？
呢排股仔成日出事，以往幾個月都冇一單，依家差唔多每個月都有，證監會自然要加大監管力度，全天候（目及）實，以防漏網之魚。好彩證監會內堅係有「惡犬」，（目及）實兼咬住違規者唔放！
魏建新綽號Bulldog
點解咁講？話說主力負責調查同執法的證監會法規執行部執行董事魏建新，綽號有Bulldog（鬥牛犬）之稱，佢被以前嘅同僚形容係Bulldog，性格好適合做強硬的執法者，同警察一樣。
鬥牛犬特徵係體態穩重、肌肉發達、堅決且勇敢，絲絲見魏建新大大隻隻外形健碩，真係睇得兼打得！
施衛民被指洛威拿
唔講唔知，原來魏建新嘅上手、有「打虎英雄」之稱的證監會前法規執行部執行董事施衛民亦都有「洛威拿」（Rottweiler）外號！有獨立股評人便曾經講過，好多人認為施衛民好難應付，但施衛民職責唔係要討好人，故此希望佢係洛威拿而非貴婦狗（Poodle）。
絲絲上網搵洛威拿嘅資料，原來洛威拿通常做警犬、警備犬等，佢哋唔會主動惹事，但警覺性極高，有乜唔妥，就會對你有所警告。
咪睇施衛民外表斯斯文文，對違規者真係零容忍，傳聞有違規者曾被佢鬧到出電梯門口，問你怕未！最經典係當年雷曼迷債爆煲事件，好多違規銷售銀行都畀佢嚇窒。
余絲韻