Market Insight：新能源車股蓄勢待發

公司同時預告今年首季度純利下跌23至35%，主要係受新能源汽車補貼政策變動影響，故見績後比亞迪股價受壓，昨收報43元，跌3.26%。

其實，早前產銷數據已顯示，新能源汽車一月份產銷量分別只有6,889輛及5,682輛，同比分別大降69%及74%，主要係未有完成推廣目錄的重新審核而無法正常銷售，即係話屬非戰之罪。

再睇國家工信部最近公布的二月份數據，當月新能源汽車產銷量均完成1.8萬輛，同比分別增長15%及30%，可見情況已有改善，只係總體而言，首季受政策負面影響是有的，但亦應該早已反映在估值上，故現時才因為呢個「壞消息」而沽貨實在可免。

不單只比亞迪，不少拿了新能源汽車牌照的車企，至今仍在等待發改委就產能的審批，若然上半年提速，全年計新能源車股展望並毋須悲觀。就連股王騰訊控股（00700）都揮金入股Tesla 5%股份，可見新能源電動車產業絕對唔係玩玩吓，到底行業爆發點在今年下半年定明年，就要拭目以待。

港股不應太依賴北水

港股昨日隨外圍高開後，之後反反覆覆，一度倒跌，恒指最終收報24,392點，升46點，大市成交繼續淡靜，主板僅772億元，主要係本周以來流入的北水似乎有所減少。

招金留意吸納機會

古勝就認為，互聯互通機制應該係有利建立多一個途徑讓資金往來投資，如果港股吓吓要坐喺度靠北方熱錢打救先有飯開，變成單邊運作，外資參與有減無增，咁嗰班財金大員實在好應該閉門思己過，點解香港股市喺佢哋領導下行頭好似愈嚟愈窄，去到咁依賴的地步！

恒指企喺24,000點樓上，開始有公司乘機進行抽水活動。招金礦業（01818）宣布配股集資12億元，配股價6.93元，昨股價回落半成至7.1元，照計落到接近配股價或7元邊唔怕買。

此外，前日復牌股價急挫的駿傑集團（08188），昨日股價大幅反彈近八成至1.1元收市，成交達到4.03億元。不過，即使股價復牌跌八成後再彈番八成，都只係去番停牌前的三分之一價位，若然從未有沾手，冇咩理由舂個頭埋去。

芬佬對復星欠信心

復星國際（00656）高管出現地震，元老級的副董事長以健康理由請辭，同時請辭的還有一位高級副總裁，理由係需要投入更多時間於家庭。舵手郭廣昌都承認，一連走兩個高管會對集團短期發展有一定影響。

先別對高層請辭理由作過多揣測，純粹作為正常人士變動看待，按道理一家市值逾千億元的上市公司，業務上晒軌道，冇話冇咗邊個高管會營運唔到。但當然，管理層青黃不接的話，會影響集團長期戰略部署及執行能力，及時扶育年輕管理班底接棒，亦是一家公司要保持長青而必要有的安排。

講番復星股價，昨未受管理層變動消息影響，升2%收報11.72元，以現價計往績市盈率不到10倍，周息率1.4厘。老實講，估值係可以好一點，但礙於早前出現過高管突然「失聯」事件，雖然事後復常，集團運作冇問題，但一朝被蛇咬，班芬佬始終未敢再放膽坐重貨。

走勢上，復星去年下半年至今復星股價一直受制於12.3元水平，仍為短期阻力，回吐初步支持喺250日線11.2元。

古勝