絲絲講場：輪王劉嘉輝考牌揸大巴
滙豐「輪王」轉揸巴士？話說滙豐環球資本市場機構客戶及財富管理銷售亞洲區聯席總監劉嘉輝（Billy）喺佢嘅fb上載咗幅揸大巴英姿相，原來係佢最近考咗大巴牌，仲係一Take過！不過佢並非要轉行，只係為咗實現童年夢想！
「經濟差都有後備方案」
聽講有咗大巴牌後，旅遊巴、私家小巴都揸得。Billy就喺fb出Post笑話自己可以做巴士車長、可一次過同50位朋友一齊遊車河、甚至如果經濟轉差都有備用方案咁話。
佢啲Post吸引過百個Friend讚好，戥佢開心。Billy仲好Sweet咁留言話：「有兩個化骨龍喺屋企，喺時間同精神皆缺乏嘅情況下挑戰自己，感覺特別好！但老婆大人嘅體諒同包容也很重要。」
聽講Billy早喺18歲時已考到車牌，今次佢考埋大巴牌，唔知會幾時揸巴士過吓手癮呢？又或好似佢朋友留言咁話「輪王揸大巴，帶大隊去炒輪？」
仲記得有位9A狀元會計師放棄高薪厚職，轉行揸巴士，理由亦係為實現兒時夢想，仲話錢幾時都搵到，但夢想唔係幾時都可實現。照絲絲睇，其實可以好似Billy咁，做住「輪王」考大巴牌「過吓癮」，麵包與夢想，其實睇比重，可以完全冇衝突。
余絲韻