身為兩條化骨龍的老竇，今日我想同大家分享一吓湊仔經！面對小孩於某一個方面（例如食飯、刷牙、執玩具同做功課……）唔肯自動自覺的話，家長們最常用的方法一定是──「綑綁」！
別誤會，我不是叫你綁起個仔，而是畀個完成任務後的獎勵佢，例如：「你乖乖哋食飯啦！食完飯，我開部電視畀你睇！」不過家長應用時要記住，真係要等食完飯後至開電視！否則，只要你試過一次，未食完飯就開電視的話，那你的威信便已蕩然無存了！以後唔使旨意再用這招氹個仔食飯！
湊仔的貼士就畀完喇，到底關炒股咩事呢？是咁的，「侵侵」於上個月同大家講，只要眾議院通過醫改修訂方案，會拿稅改這甜頭出來獎勵大家嘛！不過，眾所周知，目前個醫改方案已拉倒了！就算「侵侵」於事前出盡九牛二虎之力游說，最終想投反對票的共和黨人反而愈來愈多！
好啦，既然表決都是注定失敗的了，要避免失敗的唯一方法，咪就係取消表決囉！為免市場憂慮醫改唔通過，稅改便唔會出台，「侵侵」都算好好人喇（佢其實係擔心兵敗如山倒，害自己孭鑊啫！）仲放口風話可以跳過醫改，直接談稅改添！吓？！咁同我向個仔講：「阿仔你唔使食喇，放低飯碗去睇電視啦。」有咩分別？以後「侵侵」再講嘢，仲會有人信？
就係咁，「侵侵」威信正式玩完！美匯指數周一晚回落到99之下，道指則錄得連續八日調整，落到50日線20,460點的邊緣。我認為道指於今浪要見20,000點的機會幾高，但是未必需要再穿。港股的表現就要睇北水喇！假如北水繼續係咁乾巴巴的話，就24,000點見啦！
富昌金融研究部總監 譚朗蔚（作者為註冊持牌人士）