Market Insight：聯想尚欠復甦動力

戰略轉型要加把勁

其實，聯想能夠喺內地做到咁大，同佢係超級民企的身份有莫大關係。政府部門同國有企業都指定用聯想個人電腦產品，生意唔憂做，正如今時今日的騰訊控股（00700）一樣，唔係央企，但猶如持有內地互聯網通訊平台特許經營權，差唔多做獨市生意。

不過，近幾年智能手機普及化，個人電腦市場增長無以為繼，聯想進行戰略轉型之路不平坦，要走出去，透過收購海外品牌擴大海外市佔率，但整合有一定難度。再加上手機市場競爭日趨激烈，內地經濟增長放緩，電子消費品市道亦一定程度受影響，令近兩年聯想股價反覆走低，由高位14.3元回落至低位僅4.49元。

始終聯想乃內地知名品牌，喺內地市場的發展優勢不能完全抹殺，股價跌至現水平，不宜再過度睇淡。齋睇牌面，喺見到業務有較清晰復甦軌道出現前，股價會維持喺4.5至5.5元水平上落的機會較大。

短線去向還看內銀

期指結算加埋基金季結，港股唔爭在托多一、兩日。昨日恒指高開逾百點後企穩喺24,300點水平，但好明顯現貨成交靜咗，大市主板成交僅694億元，當然大家都知咩事。暫看已公布的藍籌股業績唔差，而嚟緊四月復活節假前會唔會再去一浸，就要睇呢幾日內銀股業績生唔生性！

駿傑復牌打回原形

上市半日就被證監舉牌叫停的創業板新股駿傑集團（08188），為咗達成增加公眾持股量的復牌要求，大股東要透過配售減持至55%，市傳主持人四出搵人認購坐貨。昨日公司終於復牌，股價裂口低開見0.7元，全日高位0.72元，之後撻到落最低見0.53元，收報0.61元，跌幅82%，成交額達1.67億元，市值得番3.05億元。

照計呢隻股高位派唔出，成手貨未甩，惟今之計係喺低位行一段時間，等風聲冇咁緊先至再搵機會。當日風頭火勢下仍大炒特炒，依家代價不菲就只怪自己攞嚟！

新能源車股伺機買

首季內地汽車股表現令人喜出望外，最醒神係隻藍籌新貴吉利汽車（00175），由去年十二月低位7.02元抽到上三月高位見12.62元，累計升幅接近八成，真係揸中一隻都經已贏到開巷！

反而隻龍頭新能源汽車股比亞迪（01211）升幅有限，表現落後同業，照計今年業績有望持續增長，若板塊景氣維持，次季有條件發力追上，不妨留意收集機會。

截至昨日為止，首季藍籌吉汽表現暫時稱冠，其次係瑞聲科技（02018），雖然尚未能突破百元大關，但季度至今累升三成多，長情小股東都應該好滿意。

至於表現較差的，除咗「三桶油」中的中石油（00857）及中海油（00883）外，公用股長江基建（01038）同電能（00006）首季至今錄得微跌，畢竟美國利率正常化啟動，過去十年坐享的低息環境已告終，公用股單以息誘人未必再咁吸引。

古勝