「債券大王」格羅斯喺一四年向有份創立嘅太平洋投資管理（Pimco）嬲住劈炮，話自己係畀幾個高層用陰謀逼走，糾纏咗兩年半，依家Pimco終於同意向格羅斯支付8,100萬美元（約6.3億港元）和解。聽講筆錢會捐去格羅斯嘅家族慈善基金。
事實上，格羅斯之前係向Pimco索償至少2億美元（計起成15.6億港元）花紅連薪酬，依家筆6億港元和解費好明顯差成截。不過，明眼人都睇得出，佢志在嘅唔係錢啦，而係啖氣。
所以，Pimco今次都畀足面佢，承認格羅斯對公司作出嘅貢獻，任命佢為Pimco慈善基金嘅「名譽董事」，並成立以佢命名嘅「格羅斯大獎」，兼仲會喺總部設立「創辦人紀念室」表揚格羅斯嘅功業。
雙方周一發表嘅聯合聲明更互戴高帽。Pimco首席投資總監Dan Ivascyn讚前老細喺「聲名顯赫嘅投資者同慈善家，對Pimco有深遠影響，才華令人敬佩」；格羅斯亦回番句話「Pimco喺自己嘅家，雖然有意見不合，但好榮幸有機會喺嗰度工作，樂見公司由有能力嘅人打理」。絲絲幾時都話，大家好來好去咪幾好。
余絲韻