絲絲講場：馮孝忠爆鄭海泉好打得
恒生銀行（00011）執行董事兼環球銀行及資本市場業務主管馮孝忠（Andrew）話，滙豐首位華人大班鄭海泉係好打得之人，不過手法就比較傳統！係講打乒乓球。
尋日恒生乒乓球學院畢業典禮，平日官仔骨骨嘅Andrew，亦於乒乓球枱露兩手，同香港乒乓球代表隊成員杜凱琹搓咗成32球，鬥得難分難解，可惜最尾5比7不敵杜凱琹。Andrew手波唔錯，但喺張迷你乒乓枱上打，難度係高咗，佢為咁仲特登早成個鐘落場練下波感受下張迷你枱添。
台下好精靈嘅乒乓球運動員同樣吸睛，最細嗰個得5歲，成班小鬼仲話司儀計錯分添。場內仲安排咗啫哩糖同咖喱魚蛋招呼大家，恒生真體貼！
余絲韻