絲絲講場：宇宙最強密碼點Set？
你個密碼有幾易被盜？依家咩個人資料都上網，黑客利用「Brute Force」（暴力攻擊）程式，一秒鐘已經可以破解800萬個密碼，「123456」、英文名、英文單字唔使一秒就「撞中」！
兩成人所有戶口同一密碼
不過大家似乎未識驚，Mastercard研究顯示，竟然有21%受訪者為自己所有Account設相同密碼；而52%嘅人仲以生日日期、家人同寵物個名做密碼，即是何止黑客可以「秒破」，連熟人都隨時可以撞中！喂係唔係講緊閣下呢？
查實每人每日平均入8次密碼，日本人平均更高達11次，所以全球超過一半受訪者希望密碼以其他更方便嘅保安措施取代。
密碼真係好難攪，Set得短又怕被盜，長又記唔住。個研究仲話，84%用戶試過唔記得密碼，而每次重設平均花11分鐘，有六成因為輸入密碼問題而錯失買演唱會飛之類嘅講求時間性交易，有超過三分之一人試過因而索性放棄網上購物。
依家雖然手機有指紋解鎖，不過生物認證有排都未完全取代到密碼，所以暫時都係要靠大家死背。有乜解救？Mastercard教路，密碼愈長愈好，而且唔好只得數字，要包括大細楷同「@」「!」等特殊字符；名字、地方、電話號碼同生日日期通通絕對唔用得；密碼唔好用啲組合詞彙或關聯短句，尤其唔好英文，換言之愈無厘頭愈好；最最最緊要係，記得定期更改密碼！
余絲韻