絲絲講場：瑞銀于正人原來係Art人
成日話投資係一門藝術，咁近距離接觸藝術會否投資成績好啲呢？瑞銀輪王于正人（Johnny）呢兩日就搵埋幾位財金專家率先齊齊藝術吓，激發靈感。
證券界出席撐場
講緊係巴塞爾藝術展（Art Basel），雖然展覽周四起先對公眾開放，但由於瑞銀近幾年都係Art Basel嘅主要全球合作夥伴，所以瑞銀亞洲股票衍生產品銷售部董事總經理Johnny今年可繼續以「主人家」身份，邀請金融界友好喺周二同周三嘅貴賓預展，率先一齊觀賞藝術作品。
金利豐證券研究部執行董事黃德几、永豐金融集團研究部主管涂國彬、君陽證券行政總裁鄧聲興等都齊齊出席撐場。黃德几更帶埋太太與兩個小朋友一齊去添。
咁多展品，Johnny最印象深係邊件？佢話仲要睇睇先。係喎，仲有幾日慢慢睇。
余絲韻