絲絲講場：機械財顧爭食股評人：冇有怕

話說，高盛周一喺紐約一個求職網站登廣告，請軟件專才開發「機械財務顧問」，專為富戶提供自動化投資服務，包括設計投資組合同分析等。

「我勝在感情豐富」

本地股評人驚唔驚機械人殺埋身？富昌金融研究部總監譚朗蔚覺得，機械財顧係大數據嘅產物，但講到畀投資建議，係要度身訂造嘅先會Work，「真人顧問嘅解釋與分析唔係電腦可以相比，所以係取代唔到我嘅！唔同人寫嘅研究報告都有唔同嘅筆風同表達方式啦！」

有乜嘢係勝過「機械財顧」先？「我嘅表達方法不嬲都係生動！第日除咗唱歌之外，我仲會諗更多新奇有趣嘅方法講股經。」

人機合作料Win Win

晉裕環球資產管理投資研究部投資策略師黃耀宗亦話：「同機械財顧比，起碼我勝在感情豐富啲，喺財富、投資管理上，甚至講到家族傳承都會人性化啲啦！」佢估計機械人理財服務只係建基於投資產品往績，「但成日都講『產品往績不代表將來』啦，係咪？」

不過黃耀宗相信，真人同機械人兩者可以有協同作用，有Win Win效果。雖然部分理財顧問服務未來或會被取代，但佢話「自己有競爭力，唔擔心飯碗被搶！」

余絲韻