孖妹S檔案:超班IT架生 炒股快狠準

現代管理學之父德魯克(Peter Drucker)名言:「不創新就等死」(Innovate or Die),唔止喺管理公司上用得到,喺波譎雲詭嘅股海都同樣如是,依家股友已經學精晒,技術指標、圖表分析未必難到佢哋,想喺股海尋寶就一定要走在最前線,孖妹有幾位朋友更發明咗自家投資分析方法,用盡洪荒之力搵銀,睇吓佢哋有乜秘技咁巴閉?

數據挖掘 資訊夠精

歐:Jarvis Technology創辦人兼期權專家 歐陽一心

彩兒:你舊年年尾辭咗中國銀河國際證券(香港)份工,轉身開咗間IT公司,究竟係咪看破紅塵、嫌錢腥,定係想做宅男日日打機先?

歐:上年AlphaGo贏咗南韓棋王,人類處理數字一定唔夠電腦叻,令我想諗吓有冇一啲係AI人工智能做唔到嘅地方,有咩計去將人類輸畀電腦嘅時間盡量拖延,所以開始想成立Startup公司,舊年年尾就辭工搞咗Jarvis Technology,我哋想推出一款幫到投資者嘅產品,唔需要佢哋日日再上facebook度碌,幫到佢哋搜集好市場數據、做好分析Report。

我係搞手,成間公司有5個人,場地加電腦初步投資十幾、廿萬,現時套系統仲喺創建嘅階段,所以未有相關收入。

網民情緒都有得睇

Kitty:我啲金融人朋友成日開口埋口講金融科技(FinTech),你啲Report係咪用大數據去做?

歐:大數據真係要龐大人力物力,其實識得寫程式,或者係做開資訊科技行業嘅散戶都可以做到Data Mining(數據挖掘),我自己都係半途出家,但若然係睇電視財經節目炒股嘅,就要讀多幾年書先。其實特首選舉之前,好多機構都做緊輿情分析,喺facebook睇吓網民對各候選人嘅關注度,透過表情符號、Like嘅數目,就可以用量化嘅方法,睇整體網民喺主流媒體平台上嘅反應係正面定負面;其實股票同股市都可以咁做,但相對做法就會複雜啲,因為目標同題材眾多。

大數據嘅分析最高難度在於最終點樣詮釋數據,我哋主力做嘅數據挖掘未去到大數據級數,但做法係做資料分析,睇網民情緒係正面定負面,入市意欲高唔高,討論焦點喺邊等。

Algo系統高效率揀股

盧:ASC分析系統創辦人 盧駿匡(Chris)

Kitty:ASC即係Algo System by Chris,涉及演算交易(Algorithm Trading),你不嬲用開技術分析,你套分析系統集合咗你多年嘅技術分析心血入去,用咗咪等於你幫我分析股市同揀股?

盧:呢套系統係我同資訊科技界朋友一齊開發,佢係全自動化嘅,做法係將我由○九年至今開發嘅技術指標同模型放入去,務求用科學化方式量化市場動態,系統會提供多個市場寬度指標做大市分析,程式選股會基於特定技術分析條件喺每日收市後自動篩選股份,慳番好多時間,提高效率。

其實恒指只係有50隻成分股,反映唔晒全香港約2,000隻股份,系統會全面反映市寬,推測短、中、長期市底去向,亦可以清晰地去分析大市係牛定熊、轉角位等等。

分門別類 逐一分析

彩兒:望住你套系統,我頭都暈埋,好彩入面有影片教學。

盧:系統選股係會主力關注「順勢股」、「突破股」、「反彈股」、「爆升股」、「半新股」等,當中每一個類別都會計番關鍵位、首目標、起始止蝕,會有信號反映長短線股價趨勢、同埋動力指標,亦會反映番同大市比較,例如長短線股價趨勢咁,綠色就代表向好、黃色代表冇方向、紅色就代表走弱緊。股友炒中、小型股,會留意開中央結算系統(CCASS),喺系統都會Show到股權分布、五大同十大持股佔比。

睇番系統嘅市寬,我認為三月個市未跌完,但四月就會做好,因為一般大市RSI(相對強弱指數)由超買區跌到去50水平樓下係需要一個月時間左右。不過,系統數據只作參考,用戶最緊要係嚴守止賺、止蝕位。

軟件R搵出完美組合

雷:香港電腦學會軟件及系統過程改善專題小組委員 雷劍文

Kitty:原來有個投資軟件叫做「R」?

雷:冇錯,呢個軟件名稱簡單,就一個英文字母「R」。大家要學識佢難度有幾大,就見仁見智喇,因外國高中學校有教,用來幫學生學習統計,但R亦係華爾街專家、物理學博士等日常使用嘅工具。其流行程度近年不斷上升,主因愈來愈多專家用呢個軟件編寫咗多個唔同嘅應用包(Package)。

配應用包強化功能

彩兒:應用包?乜東東嚟?

雷:簡單嚟講,你可以把R想像成一部行Android系統嘅電話,為何依家用Android機嘅人多過用Windows Phone或者BlackBerry,某程度因為Android機用到較多應用程式(App),猶如一部電話就算設計幾精美,新功能幾多,如果唔能夠安裝App,相信大部分人都唔會買。同樣道理,R因為有大量唔同嘅應用包才顯得特別。一般人只要學識執行呢啲已由專家編寫好嘅應用包,就可對數據進行分析。更重要係,R同應用包都係免費使用嘅。

Kitty:講咗咁耐,R對投資有乜幫助先?

雷:一般人可按各自需要,搵啲與財經有關嘅應用包。舉例,應用包「TTR」包含大量技術指標,數分鐘內就可搵到過去邊啲日子,恒指嘅相對強弱指數處超買和超賣水平,同埋其後恒指走勢係點;又或者,投資者想知道點樣嘅投資組合比重,「風險低、潛在回報高」,就可運用應用包「fPortfolio」,打幾句程式碼就可得出結果。

彩兒:講就天下無敵,有冇具體例子?

雷:再以港股為例,若果恒指喺高位出現大陰燭,且收市價較開市價跌超過250點,意味後市往往上升空間有限,雖然未必立即下跌,但投資者都要做好心理準備,特別喺期指結算前後更要小心。

Kitty、彩兒

若有料報畀彩兒同Kitty或有嘢問,可電郵money.biz@on.cc