絲絲講場：高登新翼清場 租客轉舖貴3倍
尋日深水埗三大電腦商場之一嘅高登電腦中心，佢新翼部分即高登電腦廣場正式清場，市傳畀新業主高價收購會變做戲院。高登新翼充滿電子迷嘅回憶，咁就冇咗真係喊出嚟！
傳還原做番戲院
高登新翼前身係戲院，十年後嘅今日，新業主又將佢還原成戲院。絲絲特登踩場，同個別留守到最後嘅店主傾偈，發覺店主如果想喺同區搵舖，就焗住捱貴租，租金高咗1至3倍添。
美聯工商舖張殷焌透露，區內地舖好似旺啲嘅桂林街，一個300至400方呎地舖月租大概5萬蚊，做飲食嘅舖位月租要成11萬！佢估高登新翼交吉後可能帶動深水埗嘅租金上升。
電子迷集體回憶
臨別秋波，專賣航拍及智能電動車等新科技產品嘅Zeta就搬到新翼所在嘅桂林街地舖。老闆丁圳慨嘆：「失落都冇用，我對高登冇咩感情！」丁圳話Zeta新地舖面積逾千呎，比舊舖細三分二，租金連差餉地租每月17萬，連埋租逾2,000呎倉，租金開支多咗1倍。
專賣中韓智能手機及電子科技產品嘅泡菜屋負責人Gordon就唔捨得高登新翼，佢間舖會搬去附近長沙灣道某地舖閣樓，新舖面積比舊舖多逾100呎，即500幾呎，但租金貴咗3倍。
余絲韻