今浪我是從三月三日開始，透過本欄大大聲同大家講做淡的！原因好簡單：聯儲局於十五日加息的可能性當時已飆到上八成，你哋一個二個扮睇唔到，仲唔識得於三月二日趁美股急升，恒指借勢夾上24,080點「逃生門」打開的時候脫身！
結果，恒指於當日高開低走，倒跌收市，並形成了一支同去年十月出現過一模一樣的穿頭破腳大陰燭！於是我便於三日借本欄大嗌：「揸多陣cash，無蟻咬的！」
隔晚美國公布了最新的ADP（小非農）數據超預期咁好，刺激加息的可能性正正式式見了紅底！炒港股的人終於都醒覺喇，無謂再攞住張「24,500點樓下好多熊」的牛熊證街貨圖來呃自己。
事實係，我信個市唔會太淡，不過，隨住日子一日一日咁過，距離下周三「三料日」（聯儲局加息、聯邦債務上限到期、荷蘭大選）愈來愈近，大戶同老散之間的角力已經來到生死時速：既然大戶在有限的時間之內上唔到樓上屠熊的話，就惟有連自己都走啦。無理由為了唔放過大家，就夾硬焗個市上去嘛？到頭來連自己都走唔到的話，咪仲慘過派彩畀班淡友？
以上純粹係我自己幻想出來的大戶心路歷程，好明顯，我係見我自己睇中咗先夠膽出來認叻的！不過，無論大戶的心係點諗都好啦，我們都必須要正視目前華爾街最hit的一個term：「Yellen call」。
佢同幾年前的「Bernake put」是剛剛相反的，昔日係放水（easing），而今日就係收水（tightening）。傳統智慧話畀我聽，一個字頭的誕生，唔只會last一段短時間。美國聯儲局於下周加一次息，斷不會轉個頭就放鴿的。
恒指於今浪要落到十二月低位21,488點同上月高位24,216點之間0.382的黃金比率即23,174點。下周三，我會於本欄公開多一個危機，陪住大家等耶倫發落！
富昌金融研究部總監 譚朗蔚（作者為註冊持牌人士）