Market Insight：體品股業務有起色

運動衫、運動鞋都係潮流服裝，市場上唔少品牌都主打休閒服裝，以迎合市場需求，且有不俗增長。國際品牌具知名度，成功喺全球市場搶到唔少市佔率。

內地近年亦不斷推廣體育產業發展，為體育用品相關企業帶來機會。即使本土品牌如李寧（02331）、特步（01368）及361度（01361）等，去庫存周期結束後，近年業務都有起色。講番寶勝，舊年累計經營收益淨額為162億元人仔，按年增12.4%。至於裕元，業務包括鞋類代工及銷售，舊年累計經營收益淨額為84.8億美元，按年微增0.6%。

裕元逼近兩大阻力位

不過，論走勢的話，兩者股價仍處於由舊年九月延伸的下降軌，走勢未見好轉前，都係先靠邊站較好。一月初寶勝發現去年十二月若干銷售紀錄不正確，事件拖累兩者股價於一月九日急挫。寶勝昨收報1.95元，仍未補回當日下跌裂口，裕元則升近250日線及29.75元橫行阻力位，若未能突破，有機回試26.8元水平。

港股跌咗先並非好兆頭

個市昨日無段好睇，有過千隻股票見紅，一副散水格局。石油、資源股散晒，得番個別汽車零部件及銷售股，好似元征科技（02488）、耐世特（01316）、敏實（00425）、新晨動力（01148）同正通汽車（01728）仲有資金捧場。

美股大孖沙食胡

恒指今浪在24,216點見頂，跌穿10日線之後，一直喺該水平樓下發展。「兩會效應」谷唔起個市，就真係要計計回得幾深，以21,488點起步，累積2,728點升幅計，回吐一半可見22,852點，即使基本消費，回吐升幅0.382都要見23,174點。期指、輪證客不妨睇住上述兩個位有冇支持，再釐訂入市策略。

美國利率期貨預示下周美國聯儲局加息機會率達百分之一百，話就話大家有晒心理準備，短期「侵侵」減稅及基建投資倡議曝光，「炒預期買入，落實前賣出」乃股市金科玉律，近日美股升勢放緩，一副大孖沙食胡格局，二仔底死跟的港股率先自爆，唔係太好兆頭也。

落實加息前先行減磅

美國公布的石油庫存大增，令紐約期油隊穿咗50美金大關，為去年十二月以來首見。道指連續三日回吐，睇番主要由低市值股組成的羅素2000指數，查實已連隊五日，返回二月初水平。

下周聯儲局加息幾成定局，有人認為聯儲局主席耶倫近排如鷹后上身，似乎係決心同「侵侵」對着幹，「侵侵」要企業回歸創造就業，耶倫就加息同佢唱反調。

市場驚倫媽玩大咗

由上一任主席伯南克，到依家的耶倫，講過N次要美國利率正常化，可惜一直得個講字。同一言堂的格林斯潘相比，兩位最輸蝕係對華爾街賓架的震懾力唔夠，往往被市場牽住鼻子走，成日驚推冧市成為千古罪人。結果一拖再拖，金融海嘯已十年，一五年先能夠「一年一度」咁加息。

今年咁難得神經刀「侵侵」亂向選民開期票，華爾街又真係「受」，美股升到唔識停，愈喊加愈高興，試問依家唔加仲等幾時！

依家最驚倫媽玩大咗，追加累事。點都好，留意下周議息後發言，現時先減一減磅，小心駛得萬年船。

古勝