絲絲講場：老行尊感慨：港股史上最悲
股壇老行尊張天生入行接近六十年，股壇有咩風浪未見過，股災都經歷過唔少次，見慣不怪。喺股壇打滾大半生，但佢就向絲絲慨嘆香港現時嘅金融市場係歷來最悲！發生咗咩事？
張天生雖然已屆古稀之年，對金融市場動態仍瞭如指掌。佢話，近年喺香港上市嘅股票，喺佢眼中風險程度十分高，近期啲公司上市後表現如何，投資者「有目共睹」，直言香港呢個「國際金融市場」，依家對本地中介人以及投資者，冇乜好處。
科技進步 信任反降
佢仲話加入呢行以來從來冇試過同客拗數，大家講「信」字，但科技進步下，唔少經紀同客戶反而互不信任，拗數時有發生。他大嘆「奈何！」佢希望各機構及有關部門關注，正視金融市場出咗乜問題，否則香港嘅「國際金融市場」招牌只係虛有其表。
張天生以往都講過窩輪、牛熊證等衍生工具，令散戶輸唔少錢，佢今次再點評金融市場問題，睇嚟好值得大家深思，究竟出咗咩毛病！
咁又係，張天生閒時湊孫同煮番幾味，早可不問世事，現都要批評金融市場毛病，大家真係要正視。
余絲韻