絲絲講場：零售差？GU港舵手未驚過
UNIQLO嘅姐妹品牌GU第一間香港店本月底開幕，作為GU香港區掌舵人（COO）嘅小倉慎司，原來係自薦過嚟香港大展拳腳，仲話就算香港零售市道依家咁差，反而覺得係一個大挑戰，自己鍾意接受挑戰咁話！
愛搭巴士 食格仔餅
小倉San話，自己至今喺UNIQLO母公司迅銷集團（06288）已經做咗十八年，當中喺GU就九年，之前亦有負責過GU台灣及上海開店。佢話，今次嚟咗香港兩個幾月，已經好適應香港嘅生活，閒時鍾意搭巴士周圍去認識香港，仲話最鍾意食格仔餅，短短時間內已經食咗10幾塊咁多！
對於香港零售市道咁淡，佢哋似乎真係冇驚過，今次一開連開兩間店，仲請咗200個員工，當中包括20個佢哋獨有嘅「時尚顧問」，即係到時會有人教埋你襯衫咁喎！
只係驚閣下夠唔夠「年輕」着佢哋啲衫，事關GU嘅目標客群係20至30歲。不過咁，絲絲見小倉San自己都係一身GU，佢喺迅銷都做咗十八年，照計冇可能十二歲就出道，斷估依家都過30歲。既然小倉San都着得咁自然，各位大可放心去尖沙咀同銅鑼灣朝聖。
余絲韻